Naor Dagboekien

Veurige weke Ankem weke
*
Weke 18 (2/5 – 8/5 - 2005):
*
Zundag (8/5):
Vandemorgen bin’k eerst es (weer) doende west om an een ‘never-ending-story’ via et wereldwiede web, een aentien veerder te breien. Et is mi’j niet lokt…! Ja, en ik schaeme mi’j diepe…! Ik zag best wel een protte meugelikheden mar de hieltied (al haost een keer of tiene) a’k weer een aentien breid hadde dan vun ik dat de volgende dag mar niks en begon ik weer opni’j. Deur allerhaande omstaandigheden wodde dat dan ok vot weer deur mi’jzels ofkeurd. Ik bin gien man veur ‘teamwork’. Ik bin d’r now wel aachter da’k een einzelgänger bin, een doe-et-zelver. Rond een uur of elf bin ‘k dan ok mar even naor de radio in Noordwoolde toogd. Daor weren Henk en Frank doende mit heur Huus en Hiem. Heur gaast, Riekus de Vries van de woningstichting kon ’t wel aorig praotende holen he’k heurd.
*
Ik bin op ’t heden doende mit et ommezetten van biebelse Spreuken naor geef Stellingwarfs. Disse in Spreuken 11:22 vun ik wel aorig: "Schoonheid bij een vrouw zonder verstand is als een gouden ring in de snuit van een varken." Daor he’k dit eerst mar es van maekt: "De schoonhied van een vrouw zonder verstaand is as een goolden ring in de neuze van een varken." D’r staon trouwes wel hatstikke mooie en ok nog slim aktuele spreuken in de Spreuken van Salomo. We hebben et dan over krapan 1000 v.Chr.! Nog een hiele aorige uut Spreuken 15:33 "Bescheidenhied gaot an eerbetoon veurof." In de Spreuken kwam ik ok een mooie (onder)titel tegen veur een boek: "Een vrundelike uutspraoke is een körf vol hunning, zute veur de ziel en gezond veur et lichem." Mar ja, ik kan ze dan wel mooi vienen mar wat heb ik now verstaand van kwaliteit…
*
Mien Stellingwarver Spellings Konterleerder (SSK) stroffelt nog al gauw es bi’j et bruken van et woord ‘evenpies’. Dat ja, is et now ‘evenpies’ of ‘eventies’? Blz. 818 A-E is d’r dudelik over aj’ onder et lemma ‘evenpies’ kieken dan woj’ deurwezen naor ‘eventies’ op iene bladziede veerder. Mar ja, daor staon dan weer veurbeeldzinnegies bi’j die et meerste uut Nbk kommen en de eerste is: Hi’j het hier mar evenpies west (Nbk). Beste Henk, wat moe’k daor now weer mit?
*
*
Zaoterdag (7/5):
Ik moch alweer uutslaopen vandemorgen mar veur acht ure ha’k al vuuf heufdstokken van Spreuken roegweg ommezet naor ’t Stellingwarfs. Dit kwam ik ok tegen: "Mien zeune, luuster naor mien wieshied, geef mien inzicht een andachtig oor, zodat bezunnenheid je huden blift, kennis over je waekt bi'j waj' zeggen tegen een lichtzinnige vrouw. Van heur lippen kommen alienig gladde praoties, heur mond zegt hunningzute woorden, mar uutaenlik bin ze as venien zo bitter, zo scharp as een twiesniedend zwaord. Heur pad voert naor et graf. Een hoer kost je niet meer as iene bolle, mar de vrouw van een aander jacht op je hiele kostbere leven."

*
*
Vri’jdag (6/5):
Vandemiddag keek ik nog even op Streektaal.net en stroffelde (es weer) over et verschil tussen regel en riegel. Now is de bladziede waor ik keek wel deur de alderknapste koppen van de hiele Stellingwarven schreven mar toch… Beschouw ik et zinnegien: "Daoromme wodt et Nedersaksisch deur de regel volledig aksepteerd." Ik vien eins toch dat et "in de regel" wezen moet. Neffens blz. 1024 L-R komt et "deur de regel" ien keer veur in Nbk (!) wiels d’r wel haost een hiele bladziede mit veurbeelden staot waor as de meersten gelokkig et "in de regel" geven.

Even veerder gaot et dan over "… en d’r wo’n riegelmaotig boeken in et Nedersaksisch uutgeven." Mi’j liekt dat dit toch warkelik "regelmaotig" wezen moet. Neffens blz. 1025 bi’j et lemma regelmaot: regelmaat, vast patroon in tijd. Riegelmaot staot niet in de Dikke. Riegelmaotig wel op blz. 1055: regelmatig: geregeld. Tsja…
Nog een zin uut dat ‘topstok’: "In de aandere regio’s wodt of en toe, veurnaemelik …"
Hadden Henk, Pieter, Lex, Philo, Siemon en Johan as ‘créme de la créme’ van de Stellingwarver schrieveri’je daor mit mekeer now warkelik niet et gewone "zo now en dan" veur bruken kund. Et komt op mi’j allemaole wat Karstiaans over! Mar ja, wat weet ik now van kwaliteit…

*
Ik kwam vandaege ok een vrouw tegen die zee: "Ik moet even mit mien zoegstellegien naor Et Vene." Ik moch nooit weer raoden: ze mos veur bostkontrole naor ’t ziekenhuus. Et prachtig mooie zoegstellegien staot niet in oons dikke ABC; Frank kende et wel (vanzels).
*
In et Hooglied 7 van de NBV kwam ik dit tegen: "Laat ik die palm beklimmen, ik wil zijn bladeren grijpen."
Wi’j hebben d’r -hiel konkerdaant- van maekt: "Laot ik die palm beklimmen, ik wil zien blaeder griepen."
In de NBG-51 staot: "Ik zal op den palmboom klimmen, ik zal zijn takken grijpen."
In de Grunninger biebel: "Ik klim bie dij boom omhoog, ik wil dij doadels plukken."
In de Naardense: "In die palmboom wil ik klimmen, zijn vruchtstengels vastgrijpen."
Ik hebbe d’r mar niet meer biebels bi’j antoogd.

Bladeren, takken, dadels of et staeltien (nl.: steeltje) van bi’jglieks een appel; et is allemaole krek etzelde!
Now ja, as de kwaliteit d’r mar niet onder lidt! Mar ja, wat weet ik now van kwaliteit…
*
De webstee van de sSr is vandaege alweer bi’jwarkt…!!! Gek woj’ d’r van. Mar ik kon weer niet uutvienen wat as d’r an veraanderd is. Aj’m daor now in ’t vervolg even een sterregien (*) of zoks bi’jzetten… a.j.b.
*
*
Donderdag (5/5) Hemelvaorts- en Bevri’jdingsdag:
Vandemorgen wa’k al veur zes ure beneden want ik moch uutslaopen. Nao de eerste peer paanties koffie en wat zwaore rokeri’je bin ‘k mar weer mit Job op stap gaon. In de loop van de dag is Job (roegweg) klaorkommen. Ikke niet…
*
Van oonze verslaggever Gurbe van ‘e Gediek:
Op de Kleinestientiesweg is vandemorgen een auto mit drie manluden uut de bocht en over de kop vleugen. Doe Petrus et loekien eupendoen wol om te kieken wie d’r veur de deure stonnen docht hi’j even dat hi’j uutschullen wodde veur ‘klootzak’ mar dat bleek niet veur him bestemd te wezen. De manluden maekten ondermekeer drokte. Mar ja, waor mos hi’j disse drie manluden now naor binnen laoten…? As hi’j ze hier binnen leut dan zollen tot in lengte van daegen de hemel op ‘e kop zetten mit heur geruzie en dat gul ok veur ’t grote vuur vanzels. Hi’j het ze dan ok mar weerommestuurd naor beneden. Doe ze even laeter in ’t ziekenhuus de ogen eupen deden zee de dokter tegen de sjefeur dat ze disse keer aorig gelok had hadden. "Aj’ allienig in de auto zeten hadden, waj’ d’r riekaans niet zo goed van of kommen"…
*
Doe ‘k gisteraovend laete nog hiel even in een aandermans dagboekien zat te lezen zo’k haost daenken: had de oorlog toch mar hiel even langer duurd. Mar ik hebbe mi’j inholen, ik hebbe et toch mar niet docht.
*
*
Woensdag (4/5) Dodenherdenking:
Vandemorgen al mooi op ‘e tied naor Eanske (Enschede) onderweg. Daor de hiele dag ommesleugen en vanaovend laete weer thuus. Gelokkig laggen d’r op de redaksie nog wat binnenkommen berichten van oonze verslaggever Gurbe van ‘e Gediek.
*
Strontum (NPB). De BATU schrift brief an de Paus.
In een brief an de ni'je Paus Benedictus XVI het de BATU ( Bond van Anti-Tabberd-Uutglieders ) zien gelokweensken uutspreuken an de karkevost in et uutoefenen van zien ni'je baene. Ok is de hope uutspreuken dat de Paus nooit over zien tabberd uutglieden zal, al dan niet mit opzetzin. Mit klem het de BATU de Paus vraogt om een mouwhemd en een bostrok an te strupen as hi’j him veur dat eupen raem zien lat. Want et moet niet zo gaon as mit die veurige Paus. Die was de laeste tied algedurig ziek en slim verkolen as ie weer veur dat raem staon hadde en aentienbesluut mos ie et mit de dood bekopen.
*
Dunwaeter (NPB). Smurf ontregelt waeterleiding.
In Dunwaeter vlak bi'j Westerzee hadden de meensken gien drok meer op et waeter. De plaetselike loodgieter (plummer) Eppe Driewegkraene kwam d'r nao een kertiertien aachter dat d'r in de kraene van de braandweer een smurf verschaansd zat. Naodat hi’j daor mit basten geweld deur de ME weghaeld was zee de smurf dat hi’j et wel es perberen wol of hi’j deur een kooldwaeterkraene paste. Mar dat was niet et geval leut de smurf nog weten. Even laeter was et ok weer drok mit de drok en konnen de meensken weer waeter intappen.
*
Et weer deur Berend Thimoffeefffff:
Morgen komt d'r riekaans een orkaan en as die orkaan niet komt dan is ie lichtkaans argens aanders of d'r komt gien orkaan en zal d’r ok wel gien orkaan west hebben. Meer over et weer bi’j de volgende orkaan.
*
*
Deensdag (3/5):
Buten de deure weinig beleefd vandaege en wa’k binnen oonze deuren allemaole wel mitmaekt hebbe, dat giet jim (veur vandaege temeenste) es lekker niks an. Hool et d’r mar op da’k eins allienig mar gewoon hadde an ’t wark west bin. Meerstal wodt et rond disse tied van ’t jaor wel wat kalmer mar now niet. Now ja, mar kieken hoe ’t komt… Morgen gao ‘k (al mooi op ‘e tied) es even weer naor Eanske.
*
De sSr het heur webstee vandaege ok (al) weer anpast, staot d’r neffens de daotum onderan. Mar ik zie niet wat as d’r now aanders is as gister of eregister. Ik geleuf dat ze me now te vieter hebben willen… of mien ogen wodden hadde minder.
*
Ik moet eins ok neudig es even een verhael ofmaeken (over een jonge vrouw die bloot op ‘e baank in slaop valen is) mar ik kom d’r haost niet toe. Tevule meugelikheden, wi’k leuven, en ik wil eins alle kaanten wel uut. Et komt d’r op daele, da’k d’r now al een dagmennig mit ommelope mar d’r mar niet an beginnen kan.
*
Van de (mit) lezersgroep aorig wat veurstellen kregen veur verbeterings in Jesaja. Now ja, gaon we daor ok mar weer even tegen an… Van et Staring Instituut kregen we vandaege een uutneudiging veur de vertaelersdag.
*
Tussen de bedrieven deur ok nog even naor de bieb west en een opzettien maekt veur een kotte studie over et ‘1 meie gebeuren’. Dat hiele gedoe raekte dit jaor wat tussen de wal en ‘t oranje. Mar waor komt dat ‘1 meie’ eins weg? De starke arbeidersbewegings hier in West-Europe bin in zoe’n drie belangrieke fasen te behapstokken: zo rond 1790, 1860 en 1940.
Veur ’t zelde geld ok een opzettien maekt veur een uuttreksel over de aachtergrond van et Hooglied. Joop B. zee et laestdaegs op de spannende verhaeleschrieveri’je nog es: ie moe’n je verdiepen in de aachtergrond en beweegredens van je onderwarp. Dat wa’k doe hielendal mit de man iens. D’r wodt al zovule, zomar wat reupen…
*
Linkmiegel = sluw persoon.
Sluw = Zeer listig, geslepen.
Dit was gien al te sluwe zet.
En ok al niet al te geslepen.
Dan is ‘t ok gien linkmiegel.
Gewoon, zieligemiegel dan.
Ok wel, Naatje met de pet.
*
Karst moch toch nog weer mit doen, mit et Klunderen in de Liwwadder. Mar dat staot now dus op deensdags in de kraante in stee van zaoterdags.
*
*
Maendag (2/5):
*
De sSr maekt et now toch ok weer haost té bont mit al de ‘snelle’ anpassings op heur webstee. Haost daegeliks, mar now he'k et perbleem da'k niet krek meer volgen kan wat die wiezigings now ok weer binnen...-;)
*
Zo was ie d'r ….. en nao iene dag….. floep….. was ie ok weer vot. Och… Da’s toch eins een zielige vertoning van die linkmiegel…?
*