Naor Dagboekien

Veurige weke Ankem weke

Weke 6 (7/2 – 13/2 - 2005):

Zundag (13/2):

Krekt as gister, vandaege ok weer een protte in de weekaende kraanten omme lezen. Een meenske moet toch een betien op ‘e hoogte blieven van hoe et d’r om him henne om toegaot. Op bladziede zeuven van ‘Sneon en Snein’ schrok ik trouwes wel een betien mar ja, wie mit zwatte teer (of rooie menie) ommegaot wodt daor zels vaeks ok slim smerig van. Wat wil et geval. Now begint die beste man, Johan Veenstra, ok al mit van die malle Karstiaanse woorden en uutdrokkings te smieten in zien Klunderen van gister. A’k dit van iéne niet verwaacht hadde… Ik begin haost an mi’jzels te twiefelen dat ik gooi et even in de groep: "En lao’n wi’j dan es…" dat moet toch gewoon "En lao’we dan es…" wezen? "Iene een inburgeringskursus veurschottelen"? Die zet (of hool) ie em toch veur? "Et zol mi’j niks verbaozen…", ok krek niet verbeuden misschien mar wi’j zeggen toch zoks as "Et zol mi’j gien ni’jdoen…"? "Peerdevoels" mos ik even naokeken en verempeld ok krek niet verkeerd mar "Peerdevoelens" het de veurkeur (blz. 734 S-Z). "… en kan die, in de op disse meniere vri’jkommen tied, mit zien …" dot mi’j daenken an praot van een baentiesman. Veerder best (weer) een hiel aorig stokkien en die ni’je Burgemeester van Westaende dat moet Johan dan zels mar wodden. As ze now even opschieten mit die wiezigings in de wet die dat kiezen meugelik maeken moet, dan komt dat wel goed.

Nog niet recht an de Ovend toekommen mar oonze oold-Wiespraoter Jannes, ston al bi’j redaktie nuumd in stee van Henk K. Veerder zag ik in de gauwighied nog niet vule veraanderd mar dat zit d’r now misschien wel an te kommen. Misschien ok wel niet. In ‘Et veuroffien’ wodt Jannes ok nog even veursteld deur de buroredakteur (blz. 2) of Buro-redakteur (Kolofon) Sietske. Omreden et fermaot (om een droktechnische reden) van et tiedschrift een halve centimeter kotter wodt moet de indieling daor een betien op anpast wodden. De meerste bladzieden zullen wat minder wit blieven, zal de redaktie bedoelen. Et beste ni’js liekt mi’j trouwes toe dat d’r ni’je rebrieken in veurbereiding binnen en omreden "de redaktie altied ‘in’ is veur bi’jdregen en idenen van de kaant van de lezers!", moet dat zo liekt et mi’j toe wel haost een bladziede veur inzunnen stokkies wodden. En dat liekt mi’j wel wat toe. De redaktie legt ok nog es uut dat de redaktie verantwoordelik blift veur de keuze van wat d’r an wark plaetst wodt en daor zol meerstal wel begrip veur wezen. Dat zal best mar ik weet ok wel een peer die d’r niet al te vule begrip veur hebben en ik bin daor iene van. Mit "… ok weer een ofwisselend en lezensweerdig…" zal de kommende tied misschien bedoeld wodden want et was de laeste jaoren toch niet zo ofwisselend en lezensweerdig? Of he’k wat mist?

Zaoterdag (12/2):

Vandemorgen de meerste tied wat an ’t kraantelezen west mit een sloot koffie en een poede tebak. Nog even wat kleine bosschoppies in ’t dörp daon en even naor Else west.

Vandemiddag van alles wat deurmekeer henne daon: stofzoegen, rutewasken, ofwasken, hier-en-daor een schroefien en een ni’j laampien indri’jd en de meerste tied mit 1 Koningen an ’t schrippen west. Nao al die Psalms is dit zuver noflik om je mit doende te holen.

Now miende ik da’k argens al lezen hadde dat woensdag et ni’je Chinese jaor ingaon was. Neffens et journaal op ‘e tillevisie was dat vandaege. Mi’j ok goed.

Vri’jdag (11/2):

Et was vandeweke bliekber nog gieniene opvalen dat ‘k mit daotum nog de hieltied in jannewaori zat. ’t Kan ok wezen dat gieniene in dit onzinnige dagboekien omme zit te lezen vanzels. ‘k Hebbe trouwes al es iene heurd die wel es even keken had. Now ja, hawar..

Vandaege al veur de twiede keer een mega-order neteerd veur mien woordeliesten van een boekwinkel uut Stad. Wat hebben Grunningers toch mit et Stellingwarfs aanders dan dawwe etzelde Nedersaksisch as verleden hebben? Ik geleuf dat d’r now al meer van die boekies naor Grunningen gaon binnen as hier rondomme in de Stellingwarven.

De ni’je Ovend was gister ok weer ‘over de heerd’ kommen. Meerstal wil et luxe kaft mar muuizem eupen mar ik kreeg now iene die al twiedehaans was wi’k leuven. De inhoold he’k et nog wel es over mar de typografische kaante van dit toch altied hiel netties uutvoerde Stellingwarfs tiedschrift was d’r veer bi’j deur. Bi’j et ‘schone snieden’ was ok wat misgaon. De passtrepies stonnen nog kris-kras op de verschillende bladzieden. Ik gao d’r mar van uut dat alle aander twaelfhonderd wel goed in mekeer zet binnen en dat ze misschien docht hebben dat ik dat iene misbaksel mar hebben mos. ’t Kon minder goed terechte kommen. ‘k Zal ‘m dit weekaende es even goed lezen want daor bin ’k nog niet an toe kommen.

Vandemiddag wat bosschoppies daon en et laeste uurtien van de warkweke nog een uurtien an ’t biljatten west en taovend een begin maekt mit et vertaelen van 1 Koningen.

Donderdag (10/2):

Vandemiddag wa’k hiel even vri’jgezel. Vlogge even een gehakballegien in de panne, leek mi’j wel wat. Mien M-megien had gister krek ni’jen haeld en die mos ik eins even perberen. Mar ja, vrouwluden… Het ze me van die hiele kleine ballegies mitneumen. Loop ik altied te zuken om de grootsten die d’r mar te vienen binnen (125 gr) en komt zi’j me mit van die kleinties thuus (80 gr). Et lieken wel haost bitterballen mar dan van gehak. Now ja, gehak… Uut mien onderzukien is now bleken dat kleine ballegies niet allienig kleiner binnen mar ze smaeken ok minder lekker as een dikke balle. Ik moet morgen toch even de deure uut dan kan ‘k mooi even aanderen haelen want dissen bruukt ze mar een keer as sopballegies want die kuj’ mit goed fesoen je gaasten niet as gehakballe veur zetten. A’k mi’j een betien lelk maeke (vr)eet ik disse poede vol in ien keer zels op.

Uut de LC:
"Slechts 1 op de 250 mannen in de Leeuwarder binnenstad loopt ’s avonds of ’s nachts met een verboden wapen op zak." Hoezo ‘slechts’…

Rondkommen mit een inkommen tussen de 1.500 en 3.100 euro schone in de maond, schient nog niet iens toe te valen.

In de staot Viginia (Amerike) bin ze now doende mit een wet om et veur te wezen dat daor jonges (en mannen) mit van die malle broeken over de straote lopen. Van die broeken waorvan et kruus onder de kni’jen hangt. Aj’ de onderbokse zien kunnen dan kriej’ een boete van 50 dollar. Dan mar gien ondergoed meer an zo’k zeggen.

In Vlaanderen is een vrouw op een zebrapad doodreden deur een onverzekerde 17-jaorige bromfietser. De rechter het de overleden vrouw veur de helte schuldig verklaord.

Die bekende Stellingwarver schriever/verhaeleverteller het (alweer) geliek: De wereld is gek.

Woensdag (9/2):

Dat stokkien van gister over begin/aende en oorzaeke/gevolg, he’k nog es een schoft mit in de hangmatte legen. In biebelkringen koj’ vaeks ok allienig mar veur- en tegenstaanders tegen; Hi’j bestaot wel vs. Hi’j bestaot niet. D’r zit bliekber nooit es wat tussenin wat de muuite van et overdaenken weerd is.

Vandaege biwwe in et Chinese jaor van de haene dan ingaon. In Portugal staot de haene veur vruchtberhied. Hoe dat in China regeld is zo’k zo niet weten. Daor vraog ik mien Chinese vrundinne nog wel es naor.

Et biebelboek Psalmen bin ‘k veurlopig klaor mit. Ligt now bi’j Frank. Kan die zien tanen d’r mooi es even inzetten. Dan begin ik mar es an een verkenning van 1 Koningen.

Deensdag (8/2):

Neffens et blattien van vandaege van de Stellingwarver spreukekelinder is et vandaege (vanaovend eins) Vastenaovend en morgen is et Aswoensdag (r.k). Askewoensdag is bi'j de Rooms-Kattelieken de eerste dag van de grote of veertigdaegse vasten, die veur et Paoskefeest hullen wodt, en nao et karnaval. Et is zo nuumd naor de ceremonie van de ‘oplegging’ van aske (et askekrusien) op et heufd van de RK-geleuvigen. As je die aske op et veurheufd uutstreken wodt zegt de pastoor de woorden: Daenk d'r omme, meenske, daj' van stof maekt binnen en ok as stof weeromme keren zullen. Disse dag van bezinning is in Frankriek en Duutslaand wijded an de keunsteners (in heur relaosie tot de karke).

D’r staot ok nog op et blattien: D’r is gien begin zonder aende (an alles komt wel weer een aende). Ik zat mi’j of te vraogen as de man (m/v) daor ok een diepe filesofische gedachte bi’j had het, doe hi’j (m/v) dat zinnegien op et vraogekaortien van Henk opschreven het. Aandersomme is liekewel ok zoe’n waorhied: D’r is gien aende zonder een begin. Even een filesofisch kosmologisch argement tussendeur. Is et bestaon van "oorzaeke" en "gevolg" niet puur et gevolg van meenselike interpretaosie? Waorom zol d'r op himzels "oorzaeke" en "gevolg" bestaon? Is et niet de meenske die et zels neudig vient om van alles van dit soorte dingen uut te leggen? De meenske het et "begin" en "aende" zels bedocht neffens mi'j. De meenske geft et een naeme en et is vanzels ok zo dat d'r in oonze waornemings gien begin zonder aende en geen aende zonder een begin bestaon kan. Dan ok gien gevolge zonder oorzaeke en aandersomme. In dit verbaand komt de definitie van et "zels" deur de filosoof Kierkegaord dan ok an de odder: De meenske is geest, de geest is et zels, et zels is een verhoolding die him tot himzels verhoolt.

Doe we een weekmennig leden bi’j burgemeester Heite in zien kantoor boven in et Gemientehuus van Westaende weren hadden we et over een meugelike Stellingwarver vertaeling van "wijngaard". Heite vertelde doe dat hi’j lange leden es in Denemarken in een boekewinkel naor een boek van Kierkegaord vraogen wol. Via et Friese "Tsjerkegaard" kwammen ze d’r laeter aachter dat de beste man eins gewoon "Karkhof" hiette.

Mar ik had et eins over et blattien van de scheurkelinder. Op de aachterkaante van et blattien van gister een verhaeltien van Wiebe Scheenstra over de kruderige baarms. Doe mos ik nog even weeromme daenken an een reize die ’k veurig jaor mit Andries (oonze adderman) maekt hebbe naor Else. Andries haelde mi’j an want ik mós mitkommen om naor een bloempien in de baarm bi’j Else te kieken. Ik vien et vanzels prachtig dat d’r meensken binnen die d’r hielendal waarm om et hatte van wodden as ze een appat bloempien in de baarm zien (een wilde orchidee, in dit geval) mar et dee mi’j eerlik zegd niet zovule. Mar goed, dat laoj’ dan niet zo blieken vanzels.

Maendag (7/2):

Dit oflopen weekaende was mi’j slim vermuuiend mar ik hebbe mi’j ok wel slim vermaekt. De details za’k jim besperen.

In de kraante (LC) van vandaege las ik dat de brandweer op ‘e fiets mos om waeter te haelen waor ze een geweldige braand mit blussen mossen. Dat fietsen is wel aorig lokt; et blussen van de braand wat minder!
Een klup braandweerjonges uut Alkmaar was mit de braandweerauto op vekaansie naor Oostenriek. Hoe zullen die now in een ketier bi’j een braand wezen kunnen? Ja, daor in dat skiplakkien misschien mar vaaste niet in Alkmaar of daor krek om ‘e hoeke.

Zoe’n tien vrachtauto’s uut Stienwiek meugen heur ‘hulpgoederen’ in India niet lossen bi’j ‘kastelozen’!
Een ‘niet-blanke’ is in Ruslaand wereldkampioen scheuvellopen wodden.
Duutsers laoten heur GSM-megien anstaon bi’j ’t vri’jen, las ik. ‘t Sterregien vun dat mar vremd. Ik laot mien GSM-megien ok altied anstaon he’k ‘m even weten laoten. Ik hebbe d’r niet bi’j zegd dat et ding dan argens in de auto in de gerage ligt en dawwe daor vaeks niet liggen te slaopen.
Om een asielzuker wennen te laoten an oonze koolde, laoten ze him (m/v) eerst mar es een peer naachten buten et hekke van et opvangcentrum slaopen! As ze dat overleven dan meugen ze binnen kommen om heur inschrieven te laoten.

Meneer Blair wil allienig nog meensken naor Engelaand kommen laoten die ‘bruukber’ binnen veur et laand. Daor kan ‘k nog wel es even mit in de hangmatte liggen want een bladziede eerder gaot et in een kollumn over bruukbere vuufenveertigplussers. En dan hewwe et over oolde mannegies (m/v) die eins ok nargens nog bruukber veur binnen.
Et seksleven van politici in Portugal schient niet allienig veur heurzels mar ok veur de verkiezings van belang te wezen.
In Sri Lanka was een stesjonsjef te drok mit zien eigen haandeltien in kwark, dat hi’j d’r niet an docht het om een trein tegen te holen die even laeter 2500 meensken et waeter van de tsunami inreed!
De ‘oolde Bloemhoff’ (uut oons dörp) staot vandaege op ‘e ‘verkeerde bladziede’ van de LC. Henk en Sietske heur heit is vri’jdag wegraekt (88 wodden).

Et Chinese jaor van de aep is haost oflopen en dan wodden de honnen mooi oppoetst om straks kreers an et jaor van de haene te beginnen. Et liekt wel een puzzel.
De gerage in Et Vene die mi’j veurig jaor gien ni’je auto verkopen wol, ston zaoterdagaovend blaank van ’t waeter. Lekker puh…

In Bolsward willen ze ‘Kangoeroe wonings’ bouwen. Dat liekt mi’j ok wel wat toe. Vri’j wonen zo daj’ je eigen ‘vesite’ in huus haelen kunnen en ie hoeven mar even mit een stok tegen de zoolder te boonzen en ze schoeven een paantien koffie of een prakkien eten deur een loekien.

Iene van de blokfluiters uut de Rinkelbom was dit weekaende iene van mien vrouwvolk. ‘Oonze’ Marka wodde ok nog nuumd. Daor he’k ok al es een peer keer mit ‘op ‘e plaanken staon’.

Tien jaor doende wezen mit et op schaole naobouwen van een VOC schip. Dan moej’ nog wel haost gekker wezen as daj’ de Biebel veur (mar een peer) Stellingwarvers vertaelen.

Aenlik es iene die Essent veur de rechter sleept.

Twie joongies (14 en 15 jaaor) wodden betrapt bi’j et stelen van een auto uut een gerage in Sneek. Now moet et toch niet malder wodden!

Studenten orgeniseren een ‘stille disko’. Zo is disko eins ok bedoeld, neffens mi’j.

Keuninginne Bea dreegt straks ok zoe’n mal vierkaant hoetien uut de winkel van Keuninklike Universiteit Leiden (KUL).
St. Pieter Stuyvesant Kuiertocht orgeniseert weer een kuiertocht. Et inschrieven veur die tocht liekt mi’j trouwes een hiele toer.

Veur et overige was et ien en al sport en nog een bladziede mit radio en tv bosschoppen, dat daor wa’k vlogge deurhenne.