Naor Dagboekien

Veurige weke Ankem weke

Weke 4 (24/1-30/1.2005):

*** *************************
We zuken nog een Wiespraoter (m/v). Aj’ een posien mitdoen willen of aj’ iene weten die misschien wel mitdoen wil, laot mi’j dat dan mar even weten. Ién keer in de twie weken (veur dit jaor de oneven nummerde weken) op de donderdag van zesse tot zeuven ure, gezellig een uurtien ‘Wiespraoten’. ’t Is vanzels wel vri’jwillig mar niet (hielendal) vri’jblievende!
***********

Zundag (30/1):

De hiele dag knap ongezellig, allienig mar mit de Psalms doende west. An now toe et meenst mooie om te doen. D’r staon mi’j eins wat te vule ‘conjunctieven’ (ok wel: anvoegende wiezen) in. Et vertaelen van al die anvoegende wiezen in een betien geef Stellingwarfs is ‘a hell of a job’. "Genade zij u en vrede" of "Hef, o poorten, uw hoofden omhoog, verhef u, aloude ingangen: de koning vol majesteit wil binnengaan.", dat soort zinnegies, maek daor mar es wat goeds van in ’t Stellingwarfs. Now is et hiele biebelvertaelen trouwes al een heidens kerwei mar dat wus ik van te veuren.

O ja, tussendeur nog wel even wat onderwarpen uut de kraanten bi’jmekeer scharreld veur et Wiespraoten van ankem donderdag. Nog de hieltied gien vierde man (m/v) vunnen trouwes.

Zaoterdag (29/1):

Nao die lange dag van gister moch ik vandemorgen eerst lekker uutslaopen. Niks wodden vanzels, alweer roem veur acht ure in de bienen.

Ik mos vandemorgen eerste de kraante van gister nog even deur. In de LC las ik dat et Gemientehuus van Dokkum niet in de braand staot as de knipperlochies an de mure in et kantoor van de bode dat niet angeven. Da’s now weer echt praot van een echte baentiesman. As de laampies niet zeggen dat et huus in de braand staot dan staot et dus niet in de braand.

Ik kreeg ok netties een aemel weeromme van de Liwwadder (ofd. Samenleving) op mien reaktie van gister. Een snip: "Over de rol van gespreksleider Atze Jan de Vries zijn de meningen verdeeld. Wij vinden zelf dat hij er erg goed in is geslaagd de forumleden en het publiek tot uitgesproken meningen te prikkelen. Hij moest daarbij af en toe wat scherp zijn, maar wij vinden dat dat onder de titel LC-debat wel kan en mag, nee zelfs moet."

Veerder de hiele dag - tussen et stofzoegen en ofwasken deur - wat mit Psalmen in de weer west en es wat opzetties maekt veur een bomegedicht. Een gedicht is trouwes vaeks et uutkraomen van wartael. Gelokkig vien ie altied wel een peer van je geliekesen die et as 'mooi' bestempelen. Mar neem now bevobbeld et woord 'regen'. Regen wodt in de dichtkeunst vaeke bruukt veur et mannelik zaod (ok wel es veur de nattige ofscheiding van et vrouwelik orgaon). Hi'j bespruuide mien tunegien (miet zien regen), is dan ok gewoon wartael veur 'lekker viezerikken'. ’t Zal zien reden hebben dat ‘tuunspruuien’ niet in de Dikke Bloemhoff staot wiels d’r dus wel meer as iene betekenis veur te vienen is. Mar bi’j dichten d’r staot vaeks niet wat d’r bedoeld wodt. Dat wodt ok vaeke van de Biebel zegd trouwes.

Vri’jag (28/1):
Vandaege wa’k al mooi op ‘e tied onderweg naor de Veluwe. In de bossen van Ermelo lekker zitten te diketen bi’j Napoleon. Die Napoleon die altied mit zien haand in ’t jak staot. Ik zit liever mit mien haand bi’j een aander in ’t jak (now ja, niet bi’j iederiene vanzels). Even laeter bin ‘k deurreden naor Bunschoten-Spakenburg. Daor een vissien kocht en naor een Chinees west en laete op ‘e aovend nog even an ’t wark west in Nijkerk. Krapan drie pond zwaorder thuuskommen as da’k morgens votgaon was neffens oonze dure weegschaole. ’n Weegschaole van niks dus of… Zol d’r ok een plak in Nederlaand wezen waor a’k d’r zoe’n drie pond daegs ofeten kan? Ankem weke moe ‘k al weer dezelde reize maeken.

Donderdag (27/1):

Via de sSr kreeg ik vandaege een uutneudiging om mit te doen an een projekt ‘Kunst over bomen : Bomen over kunst’ van ‘Landschapsbeheer Friesland’. PJ was wel wat laete mit et deursturen van de infermaosie en dee om die reden d’r dan ok drekt zien verontschuldigings bi’j in ’t kevot. Omreden et al kotdag is veur de inschrievingstermien (veur 1 feb.) he’k et Laandschopsbeheer mar een aemel in ’t veuren toestuurd mit de bosschop da’k graeg mitdoen wil. ’t Moet al reer lopen wil mi’j tegen die tied (welke tied eins?) niet wat fesoenliks uut de penne lekken.

In zien briefien blift PJ ok krek as veurig jaor bi’j zien "Zommerschoele" stief volholen mit zien "zommer" in stee van "zoemer" (blz. 955 S-Z). De naeme "Landschapsbeheer Friesland", verStellingwarfst de beste man een betien en maekt daor "Landschapsbeheer Frieslaand" van. Ik hool d’r niet van om (eigen)naemen omme te zetten naor ’t Stellingwarfs mar aj’ dat dan doen, doe et dan hielendal en niet half, zo’k zeggen. Gelokkig wodt de redaktie voert deur Landschapsbeheer, aanders ha’k ok niet mitdoen wild mar et zinnegien waorin PJ dat angeft kan ‘k niet hielendal te plak kriegen: "Landschapsbeheer Frieslaand voert de redaktie over et boek, dus ik kan gien geraansie ofgeven dat ok alles plaetst wodt.", neffens PJ in zien briefien. Vuul ie ‘m?

In et verslag in de LC van vandaege over et debat van gisteraovend "Nieuwe bijbelvertaling, nou en…" vun ik te min anleiding veur een inzunnen stokkien. Mien kommentaor he’k de redaktie al even toeschikt in een aemel.

Woensdag (26/1):

Vandaege overdag niet al te vule spannende dingen beleefd. Ik hoefde gien gedichten of verhaelen te maeken, te vertellen of veur te lezen en ik hoefde ok gien beeldhouwwark te maeken.

Taovend biwwe naor theater Romein in Liwwadden west. De Liwwadder Kraante had daor een diskussie-aovend ogeniseerd: "Nieuwe bijbelvertaling, nou en…" Een priezensweerdig initiatief vanzels mar et vul mi’j niet toe. Hoewel alle viere de inleiders heur netties an heur opdracht hullen hebben deur hun inleidings toe te snieden op de NBV in een vergeliek mit veurgaonde vassies van de Biebel, leut oonze diskussieleider nogal wat stikken valen deur wat al te makkelik mit te gaon in - en soms alderdeegst uut te lokken naor - de meer algemiene diskussie over geleufsbeleving. Dat dit bi’j pattie bezuker ontaordde in een spontaone geleufsbeliedenis mag dan ook gien verbaozing wekken. Mar al te gretig wol de diskussieleider bliekber liever een diskussie over de Koran tegenover de Biebel of een meer algemien verhael over ‘wat dot de Biebel (mit) jow’ as juust de verschillen tussen de NBV en bevobbeld de NBG-51 of de Statebiebel wat uut te diepen. Doe de beste man zich veer te buten gong mit de vraogende opmarking as de uutgever de Biebel allienig mar deur een brillegien mit euro-tekens zag, wodde et alderdeegst een vrouw in de zael al te gottig en reup him (mit bi’jval uut de zael) tot de odder. Et zol taovend toch in ‘t biezunder over de (inhoold van) NBV gaon? Waorom gong de diskussie bevobbeld niet over de meugelikhied om, in de tegenworige tied van ienlingeri’je, in de ni’je biebelvertaeling et ‘Oonze Vader’ te veraanderen in et persoonlike ‘Mien Vader’ of de vraoge as et een goeie of krek een misse zet west het om de heufdletter te vervangen deur de kleine letter. Waorom ik die vraogen zels niet steld hebbe? Deur mien haandopstikken ha’k op iedere veiling grif vuuf stokken te duur an de broek kregen. Jammergenoeg wodde mien haand deur disse veilingmeester niet zien en dat is nog wel et meenste wat ik him kwaolik neme.

Deensdag (25/1):

Vandaege de hiele dag wat mit Psalms in de weer west. In NBV-vertaeling bin allienig de zonuumde 'hymnische' psalms vertaeld. Dissen hebben heur plak had in de eredienst in de synagogen en wodden vaeke begeleided deur meerdere instermenten. Et biebelboek Psalmen is te verpatten in vuuf boeken. Die vuuf boeken wodden vormd deur Psalm 1-41, 42-72, 73-89, 90-106 en 107-150. Elk van die boeken wodt ofsleuten mit een lofpriezinge, zoas in 41:14, 72:19, 89:53 en 106:48. Psalm 150 is iene grote lofpriezing en vormt de ofsluting van et hiele boek Psalmen. De eerste twie dielen bin ’k now te roegste deur west. Et mooiste zinnegien da’k vandaege in iene van de psalms tegenkwam was: Laot de vrede wereldwied wezen tot de maone niet meer bestaot."

Maendag (24/1):

Now en doe was et al weer maendag. De hiele dag wat mit barkode-printen an ’t speulen west.

Taovend het et biebelvertaelerskoppel de laeste punties op et Hooglied en op de eerste brief van Paulus an de Korinthiërs zet.

En now wi’k eins wel op bedde en dan lao ‘k mi’j even lekker vaemen… Of ik vaeme even… Ie weten mar nooit…