Naor Dagboekien

Veurige weke Ankem weke

Weke 48 (22-28/11.2004):
Zundag 28/11):
Dit riegeltien ciefers moet jim bekend veurkommen: 2001 - 2002 - 2003.
Zegt dit riegeltien ciefers jim ok wat: 124204 - 150141 - 183478 ? Morgen veerder…

Veurdaj’ et weten is ’t weer lieties-schrief-kursus dat ik bin d’r nog mar es even weer veur zitten gaon. ‘k Zat nog mar krek doe lekte mi’j dit uut de penne:

Zaoterdag (27/11):
Joukje heur ni’j boekien Herfst / Haast lag pront op de toonbaank bi’j Zwikstra zag ik vandemorgen. En veerder…

Bi’j gebrek an tied vandaege een verhaeltien da’k veurig jaor een keer vunnen, vertaeld en een betien bi’jschaefd hebbe uut een peerdekraantien:

De grauwe mere …
D'r was es een jongkerel die verliefd wodde op een hiel mooi maegien. Now gebeurt dat wel vaeker vanzels. En zoas et doedestieds de gewoonte was, vreug hi'j de heit van et mooie maegien toestemming om heur haand. De heit van et maegien gaf zien goedvienen en betaelde d'r ok nog een flink bedrag as bruidsschat op toe. Et jonge stellegien trouwde mar dat trouwde-leven bleek de jongkerel aachterof slim tegen te valen. Zien vrouw, die nog mar kotleden een mooi kreers ding was, bleek een slim baozig meenske te wezen mit as gevolg dat de jongkerel thuus niks meer te zeggen hadde.

In ‘n goed gesprek mit zien schoonheit vreug hi'j as de hiele trouweri'je eins niet weerommedri'jd wodden kon. De heit van et maegien zol dan et maegien en de hiele bruidschat mit wat rente weeromme kriegen en ze zollen d'r naotied nooit weer over praoten. Zien schoonheit zee doe, dat et hiel alledaegs is dat de vrouw thuus de baos is en dat dit bi'j him thuus en veerder ok overal, niet aanders was. Om te bewiezen dat dit in elke aandere huusholing ok zo was, dee hi'j een veurstel en zee tegen de jongkerel: "Ie kriegen van mi'j vuuf peerden, vier zwatten en iene grauwe mere. Daor geef ik je ok nog een flinke körf mit eier bi’j, 500 eier om percies te wezen. Ie meugen henne gaon waoj' mar willen om een ssorte van een enquête onder et volk te holen. Aj' argens een huusholing vienen waor de man et veur 't zeggen het dan maj' die een peerd van mi'j geven. Koj' in een gezin waor de vrouw de baos is dan geef ie heur ién ei. Aj' de peerden eerder kwiet binnen as de eier dan praoten wi'j now of dat ik mien dochter weeromme neme en dat ie de bruidschat holen meugen." "Jow bin wel slim overtuugd dat de vrouw in alle huusholings de baos is," zee de jongkerel, "mar vuuf peerden tegen 500 eier? Dat moet mi'j lokken! En zo niet, dan leg ik mi'j bi'j mien lot daele en blief ik bi'j jow dochter."

Zo zegd en zo daon. In een goeie bujje begint de jongkerel an zien opdracht. Tot zien veralteraosie raeken de eier vot as sni'j veur de zunne en begint hi'j et toch al haost een betien benauwd te kriegen. Tot hi'j opiens bi'j een gezinnegien anklopt waor liekegoed de man as de vrouw tegen him zegt dat de man bi'j heur in huus de baos is. Wow, aendelik! Et gaot mi'j dan misschien toch nog lokken, daenkt de jongkerel. As daank meugen ze een peerd uutkiezen. De man kiest hiel overtuugt veur een zwat ruun. De vrouw mingt heur ok in de keuze en zegt dat zi'j toch liever de grauwe mere hebben wil.

.....

Versleugen gaot de jongkerel weer op huus an mit 'n lege eierkörf en vier zwatte peerden. En as hi'j zien schoonheit dagzegt, moet hi’j tot zien spiet toegeven: 'de grauwe mere is et beste peerd'.

Vri’jdag (26/11):
Op uutneudiging van et Staring Instituut (Centrum veur et streekeigene van Achterhoek en Liemers) uut Doetinchem hebben Frank en ik (as vertegenwoordigers van de stichting Stellingwerfs Eigen) vandaege de hiele dag in de Aachterhoeke en et Liemerse toeholen. In de prachtige omgeving van et oolde stattien Bredevoort = Boekestad, hewwe praot mit en veural ok luusterd naor meensken (m/v) die lieke enthousiast doende binnen mit heur dialect van et Nedersaksisch as wi’j hiere in Stellingwarf. D’r weren ok aorig meensken van Drente en Twente in et gezelschop. Pracht volk in een pracht omgeving! Wat zol ’t mooi wezen as oonze ni’je stichting een ruumte vienen kon om disse meensken hier ok es uut te neudigen. We moe’n mar es perberen awwe mit de gedachte an een kultureel uutwisselingspergramme van et Saksisch taelgebied, wat uut een kultuurpottien van de Gemiente kriegen kunnen om zokke gaasten es te vraogen om hierhenne te kommen. Bevobbeld ankem jaor mit de Eupen Stal kuwwe mooi een keer mitmekeer naor et Waopen in Berkoop te dikke-eten. Oons volgende projekt is een bezuuk an een Grunniger taelgroep. Ik hool jim via dit medium op ‘e hoogte…

Donderdag (25/11):
Veurige weke zaoterdag wa’k bi’j et verschienen van Joukje heur twiede boek, Herfst / Haast in de biebelteek van Wolvege. Doe he’k aovens nog in dit dagboekien schreven da’k iene votlopen zag mit wel een tien of twintig boekies onder de aarm. Dat was PJ dus. Now las ik vandaege (in de Stellingwerf) dat de boekies ok bi’j de Schrieversronte te koop binnen. Joukje het dat boekien in eigen beheer uutgeven, staot d’r in. Best vanzels, en hoe meer d’r van verkocht of rondpat wodden hoe beter mar ik hebbe veurige jaor ok wel es wat boekies en aandere idenen van mi’jzels anbeuden an PJ, om ‘mit te nemen’ in de sutelkroje of zoks. Daor had de beste man doe hielendal gien oren naor. Ok best vanzels mar kan PJ dan es wat dudeliker wezen mit de kriteria die ze hanteren? Op disse wieze raek ik allienig nog mar meer in de hoeke van de ‘frustreerden’ en daor lopen onderhaand al zovule van rond in Stellingwarf! Mar goed, en dat moe ‘k him dan naogeven, dat is dan wel een verdienste van PJ.

Van zesse tot zeuven hewwe (Roely, Jannes, Jan en ikke) mit ’n vierend weer een uurtien Wiespraoten maekt veur RWC in Noorwoolde.

Vanaovend gao ‘k vroeg op bedde want morgen biwwe vraogd bi’j et Staring Instituut in Doetinchem. Et Staring Instituut is et centrum veur et streekeigene van de Aachterhoeke en et Liemers.

En vandaege tussen alle bedrieven deur ok nog een anzet veur een Shanty maekt vanwege Harmen zien lieties-schrief-kursus bi’j de Schrieversronte in Berkoop. Dit lekte mi’j uut de penne:

<refrein>
Veerwel mien maegien
ik moet je laoten gaon
ie hadden een strak lief
mar je hatte bleef staon.

<refrein>

Veurdregend:
En a’k now aovends an ’t waeter stao
nao een hiele dag in touw
dan zie ‘k in een lichte dieze
mien alderliefste vrouw (bis, 2^de x wegstarvend)

<ofsluten mit bulderend: refrein>

Piet Bult
Ni’jberkoop, november 2004

Veur opdracht twieje van de Lietiesschriefkursus van de Schrieversronte.

Woensdag (24/11):
An de eterstaofel een vassien maekt in et kader van de lieties-schrief-kursus. D’r lekte mi’j een biljatdeuntien uut de penne. As ’t him wat toeliekt dan wo’k ‘m mar an Frank opdregen. Dan ma’k misschien nog es kommen te biljatten.

(De eerste twie riegels van ieder couplet moe’n half praotend, half zingend ‘veurdreugen’ wodden.)
(De beide laeste riegels van ieder couplet moe’n solo veurzongen en in koor naozongen wodden.)

De taofel het vier hoeken en
een mooi slicht gruun laeken.
Deur mit een stokkien te stoten
moej’ een punt zien te maeken (bis).

Mar elke keer dat klossen
ze doen et de hieltied weer.
Die ballen, die ballen
och die doen heur zo zeer (bis).

<refrein>

Et speulveld te klein
en de ballen zo rond.
Veur daj’ et weten
ligt d’r iene op de grond (bis).

Aj’ naor de kroeg gaon
dan kuj’ je bezatten.
Speul liever een spul
gao een pottien biljatten (bis).

<refrein>

refrein:
Drie zwaore ballen
iene rooie, twie witten.
Biljatten mit jim
dat zie ik wel zitten.

Deensdag (23/11):
Gelokkig kwam de kraante d’r nog even uutgebreid op weeromme, op dat haantiesgeven van de Imam en Min. Verdonk. Et toestikken van de haand was een stuntwarkien van vrouw Verdonk vanzels want zi’j wet wel beter of heurt et te weten. Et weigeren van de Imam was van etzelde nivo want hi’j had ok thuusblieven kunt. Hi’j wus dat vrouw Verdonk d’r was en het dan ok een stuntwarkien uuthaeld. Wie is d’r now eins wiezer van wodden? Bin de verschillen zo niet vule dudeliker anwakkerd? Mar as ze now beide thuusbleven weren dan was de dialoog niet op gang kommen. Een dilemma dus. Now bin in oons Nederlaand de staot en de karke twie scheiden begrippen, he’k wel es mitkregen mar as ’t d’r op an komt dan is de staot toch de echte baos wi’k leuven. Verdonk kan de Imam wel tot oons laand uutzetten mar aandersomme niet. As ik een karke in de braand stikken zol (wa’k niet van doel bin) dan krieg ik van de burgerrechter een dreun veur mien kop (heufd) en as een karkelikse een gewoon huus in de braand stikken zol (wat hi’j (m/v) niet van doel is) dan wodt die deur krek dezelde rechter ‘hulpen’. De staot gaot dan ok boven karke; niks gelieksweerdigs an.

‘k Wor ok een betien mu van al dat economie gezeur op ’t heden. Amerike dot et niet zo best zegt men mar is nog de hieltied et laand van de onbegrensde meugelikheden. In Europe doen we et goed zegt men mar biwwe slim begreensd in oonze meugelikheden. Ik heb vroeger leerd da’k eerst speren mos en et dan kopen kon. Mien buren (niet mien naoste buren mar die van een peer straoten veerder) lienen liever van de baank en bruken de maondelikse inkomsten allienig mar veur rente en oflossing. Ze hebben wel haost tien keer zovule spullen (en rommel) as dat wi’j hebben. Economie staot dan ok niet op himzels mar is altied een vergeliek tussen twieje of meer; meensken of lanen dat maekt niks uut. Wat de iene meer het gaot altied te koste van van een aander. Awwe allemaole haost niks hebben dan zuj’ gieniene klaegen heuren en awwe allemaole een miljoen hebben zuj’ ok gieniene heuren. Mar as de iene aorig meer het as de aander, dan is et hekke van de dam. Dan wodt et oorlog om niks.

Vanaovend weer naor de lieties-schrieveri’je-kursus van Harmen west. Neffens mi’j was d’r deur de verschillende kursisten een protte wark maekt van de veurige opdracht. De haenties van de torens die vleugen over de taofel. Behalven et haentien schienen d’r ok wel es kiepies en alderdeegst een peertien op een karketoren te staon. De opdracht veur de volgende keer is vanzels ok weer het perberen om een geweldig mooi deuntien te maeken. We kregen de keuze om een vassien veur (of over) een trouweri’je, een jubileum van de iesklup, een biljatklup, een körfballied en/of een shanty te maeken. Jammer da’k vanaovend naor een verjaordagsfesien mos. Die shanty liekt mi’j wel wat. Harmen dri’jde ondertied ok nog een vassien van Karin Bloemen dat gong over et wegraeken van een moeke. Hi’j wodde daor zuver wat emotioneel bi’j want ja, zien moeke is ok nog mar krek een week of zesse leden wegraekt, he’k uut Johan zien dagboekien begrepen.

Maendag (22/11):
De minne berichten vleugen mi’j vandaege om de oren dat mien kop staot d’r eins niet zo naor om hier wat zinnigs op te schrieven. Now ja, wanneer wodt hier now wat zinnigs daeleschreven… en ja, a’j ’t es haost oflaoten willen dan wodt d’r al gauw zegd daj’ een sloppeling binnen of zo, dat ja, we moe’n mar even deurzetten ok al bin d’r vule belangrieker dingen om je henne.

Op de veurste ziede van de LC staot vandaege een foto (mit bi’jschrift) waorop een Imam uut Tilburg oonze Minister gien geven wil. Et bi’jschrift is wel wat slim summier want d’r staot wel bi’j dat d’r meer (50) Imams op die geerkomst bi’jmekeer weren mar d’r staot niet even bi’j as die heur wel een haand geven hebben of wat die d’r van vunnen. Now hool ik meer vraogen over uut zoe’n berichien as da’k volledig infermeerd bin. En as die iene Imam op grond van zien geleuf dan gien haand geven mag an een vrouw, hoe zit dat dan mit al die aandere Imams die d’r weren?

D’r krek boven staot een bericht dat d’r toch weer een (Fraanse) eurokommesaoris benuumd is die niet hielendal schone op de graod bliekt te wezen (krek as zien grote baos trouwes (en wie nog wel in dat wereltien?)).

Een zwatte Piet slaot een automobilist een hasseschudding. De sjefeur reed dan ok vusen te hadde de optocht verubi’j. We zullen et wel nooit leren mitmekeer…

D’r is now al veur de dadde keer een plaete van de Achmea-toren ofdonderd…! En ze wussen al een jaor dat disse plaete los zat…! Now vraog ik jow…

Et plaetien van de oolde rouwkoets dee me goed. De ienige keer dat et een aorighied is daj’ een rouwkoets veurbi’j kommen zien.

En dan kreeg ik in et weekaende ok nog een anbeveling om mien dagboekien wat rustgevender te maeken. Now ja, een aander kleurtien en een wat kleiner lettertype misschien? Ik heur et nog wel es.

De onderwarpen van oons Wiespraoten nog even publiceren en dan het et weer mooi west veur vandaege.

O ja, vandaege weer nog gehakballe (twieje) had mit kookte eerpels, rooie kool en zels toemaekte appelsmotse. ‘Jo moatte fier rinne om ’t better to krijen.’