Vrouw... H.    

Wark van Grietje
Stellingwarfs
Home


Vrouw... H.

Veur: Och, wat heb ik mit heur te doen. Dit had ik toch hielemaole niet verwaacht.
Tegen: Now et zat d’r wel an te kommen volgens mi’j. Ze ston al te lange veur in de peilingen. Et is krek as mit paors. Op een gegeven mement het men d’r zeker genoeg van.
Veur: Ik blief et onbegriepelik vienen. En et was ok een dudelik verschil. Wat zal ze heur ongelokkig vuuld hebben.
Tegen: Now, dat zal wel een betien mitvalen, denk ik. Zoen spiekerhadde vrouw kan wel tegen een stotien.
Veur: Dat zeg ie. Waor hael ie die wiesheid weg om dat te denken?
Tegen: Now, dat schrieven toch alle kraanten, dat ze zoen hadde en koolde is? Ze numen heur ok wel een iesknien!
Veur: Daor kan ik me toch wel zo duvels omme maeken, he. Hoe kommen ze d’rop?
Ze perberen heur op alle menieren negatief in et ni’js te brengen en over Man O. alliend mar positieve dingen te melden. Ik vien dat hartstikke oneerlik!
Tegen: Wat denk ie zol die brok in de keel en die traonen in de ogen tiedens dat interview dan echt west hebben?
Veur: Netuurlik, wat denk ie dan? Zoks kuj’ toch niet veinzen of zomar oproepen?
Et feit al, daj’ mi’j dit vraogen, maekt me al kriebelig. Daj’ zo slecht denken over die vrouw.
Tegen: Wat denk ie van dat haor van heur? Hoe lange zol ze daor elke morgen wel niet mit doende wezen?
Veur: Now ja zeg, vraog ie jow dat ok of van man O.? Komt netuurlik weer, omdat zi’j een vrouw is. Hoezo discriminaotie! Et gaot d’r toch omme waor ze veur staot? Jow man O. het et alliend mar over veraandering! Hi’j het een toespraoke hullen en toen is d’r turfd. D’r kwammen dubbele ciefers uut… Veraandering, veraandering, veraandering, mar hi’j zegt niet welke.
Tegen: Now, mar hi’j het zovule charisma, dat hi’j wel een ni’je Kennedy liekt. Hi’j geft de meensken weer hoop. En vrouw H. neemt now zels heur dochter mit om jongeren te trekken!
Veur: En wat doet jow man O. dan? Die zegt tegen alle kiender: Zeg tegen je mamme, dat ze op mi’j stemmen moeten. Komt een betien op etzelde daele, of niet soms?
En ik vien ok, dat ze al zien laoten het wat ze weerd is. Bovendien het ze al 8 jaor ervering, dat warkt in heur veurdeel.
Tegen: Now mar es een aander, een frisse wiend. Halfzwat, spreekt me ok wel an . Ik hope, dat vrouw H. de segare is…
Veur: Daor moej’ zo nodig ok weer over beginnen he! Ik bin wel klaor mit jow! De groeten!


© Grietje Bosma - Dijkstra