Vrouw... bosschopt

Wark van Grietje
Stellingwarfs
Home


Vrouw... bosschopt

Zi’j stapt mit een best tempo op ‘e fiets, sjeest et hiem of, soest de bocht omme richting et dörp. Op et stuur een deuze, in de buse de folder mit de ankruuste artikelen.
Eerst mar de super die et dichtstebi’j is. Fiets op slot, karre mit en dan zo hadde as zi’j kan de kopies binnen haelen. Nog even op et foldertien kieken, of d’r niks vergeten is.
Okee, betaelen, in de deuze pakken, karre vot en naor de fiets.
De deuze is al een stokhenne vol, dus eerst mar naor huus brengen.
        Een klein schoffien laeter sjeest zi’j d’r alweer daele mit alweer een deuze op et stuur. Et is dezelde deuze, mar weer leeg.
De volgende super wodt bezocht. De folder het zeuven krusies. In disse winkel bin mooie kopies! Vrouw… geniet! Gelokkig is alles d’r nog. Soms bin die dingen ok gauw uutverkocht, mar vandaege is zi’j d’r op ‘e tied bi’j.
Voldaon toogt zi’j et bosschoppedeusien op huus an.
Disse dag kan niet meer stokken. Hoevule zol zi’j wel niet uutspeerd hebben?


© Grietje Bosma - Dijkstra