Vergillius

Weeromme naor Klassiekers
Weeromme naor Stellingwarfs
Home


Vergillius

Veurjaor

Krek de meitied is neudig veur 't blad van de boom en veur bossen.
Meitieds dan trillen de lanen en langen naor 't zaod van bevruchting.
Dan vaalt d' Almachtige Vader, de Locht, mit bujjen van waeter
daele in et rondbostige wief heur schulk, veurnaem en geweldig
mit heur machtige lichem verienigd, kweekt et de vruchten.
Dan weerklinken uut vere strewellen de zankies van voegels,
en op zunnige daegen bedrieven koppels vee daor de liefde.
Ni'j leven in et gulle laand, veur de li'je wiend van et Westen
spreiden akkers de schulk; een lichte dieze komt over 't laand,
en in de ni'je zunne durven uutlopers heur veilig te tonen;
de wienraank is niet bange meer veur de wiend uut et Zuden,
of regen, die vaalt uut de locht mit striemende wiend uut et Noorden,
mar schöt zien bluuiknoppies op en voolt alle blaeder now eupen...

Zo en niet aanders, bin bi'j't eerste begin van de wereld, de daegen
tot wasdom kommen; en zal et gien aandere neture had hebben.
De meitied was doe al krek zo; de maanse eerde dreug et veurjaor,
en de storms uut et Oosten beheinden heur tot winterse vlaegen,
doe veur 't eerst de dieren de locht indronken, en meensken,
et slimste van d' eerde, et heufd opstakken uut stienhadde rotsen,
wilde biesten verschenen in de bossen, en steerns in de locht.


Vertaeling in ’t Stellingwarfs deur: Piet Bult
Oorspronkelike tekst: de Georgicon, vas 323 - 342, (maekt in 37 - 29 v.Chr.)
deur Vergillius (Publius Vergillius Maro, die leefde van 70 - 19 v.Chr.)