Naacht van et Nedersaksisch gedicht
Weeromme naor Essays
Weeromme naor Stellingwarfs
Home
Naacht van et Nedersaksisch gedicht
Bestuurskrisis bi'j de Stellingwarver sSr...
Et veuroffien
Et het even duurd mar uutaendelik vullen alle puzelstokkies percies te
plak. Et was mi'j vanzels al slim opvalen dat in de laeste
jaorvergeerdering van de sSr liekegoed de veurzitter (DD), de
twiede-veurzitter (GBD) as nog een lid (HZC) d'r onverwaachs mit
ophullen. De veurzitter hadde alderdeegst even eerder (1 april) al
bekend maekt dat hi'j d'r om persoonlike reden mit opholen wol. Dat van
de twiede veurzitter en et gewone lid wodde eerst mit de ankondiging in
de jaorvergeerdering bekendmaekt. Hoe dan ok, et vaalt op as drie
bestuursleden van wie twie hiele belangrieken d'r onverwaacht en
zonuumd 'om persoonlike reden' mit stoppen. Now is et vaeks gebruuk dat
een peer meensken dichte bi'j et vuur d'r wel meer van of weten en
lichtkaans wel es wat loslaoten. Ik was vanzels slim ni'jsgierig en dee
hier en daor es wat naovraoge. Et vul nog niet toe om de waore reden te
aachterhaelen mar opiens kwa'k de opmarking "daor wi'k niet over
praoten" tegen mit een ondertoontien van tja, d'r is wel meer gaonde
mar ik wil/mag/kan et niet zeggen. Et is krek as mit visken, aj' de
hiele middag gien biet zien hebben dan geleuf ie et wel en gaon gewoon
op huus an. Aj' zo now en dan wel een betien biet hebben dan woj'
scharp en juust extra gremietig om zoe'n onzichtber moonster te vangen
vanzels. In dit geval niet aanders, hoezo "ik wil/mag/kan et niet
zeggen"?
Gelokkig ha'k vroeger hoge ciefers op et vak interviewtechniek en ik
hebbe ditkeer dan ok mien beste bientien veurzet. Mit een betien
zinspeulen, een betien bluf, een betien kennis van zaeken, een betien
gelok en hier en daor wat tussen de riegels deur te lezen koj' vaeks
een hiel aende, en dat was now ok niet aanders. D'r was mit dat
oftreden van zovule bestuursleden in ienkeer inderdaod meer an de haand
as alliend dat 'om persoonlike reden'. Ik krieg onderdehaand een aorig
beeld hoe et zo gaon en kommen is, de puzelstokkies valen te plak. Van
't meitied was d'r een ploegien enthousiaste Stellingwarver schrievers
die mit een - neffens mi'j - goed idee op de bodden kwam: 'De naacht
van et Nedersaksisch gedicht'. Et idee wodde veurlegd an de direktie
(SB) van de sSr en die gaf in principe gruun locht: regel et mar, as et
oons mar niks kost, gien tied en gien centen. Uut eigen onderviening
wee'k dat aj' slim enthousiast binnen en een goed plan hebben dan koj'
veer, behalven bi'j de vermaldijde sSr. In dit geval gong et mit et
schrieverskluppien ok allemaole boven verwaachting. Zoe'n veertig
dichters uut Grunningen, Drente en de Stellingwarven, een prachtige
zael (PP) mit happies en draankies, de daotum was prikt en meer as
genoeg sponsercenten veur de 'Naacht van et Nedersaksisch gedicht'. Et
plan wodde hielemaole in kannen en kruken prissenteerd an de direktie
(SB) van de sSr, mar mit een omhael van mooie woorden deur heur...
ofkeurd!
PJ is de sSr en de sSr is PJ, zee een eerdere veurzitter (StH) van et
bestuur al es. Et is ok in de brette bekend dat et niet altied goed
akkedeerde tussen diezelde PJ en de ienigste echte Stellingwarfse
taeldeskundige (HB). Hoewel ze d'r indertied beide zonder twiefel vol
overgaove an begonnen binnen, is et deur de jaoren de hieltied meer een
haat-liefde verholing wodden. HB zien niet onbelangrieke naeme wodde te
pas en lichtkaans ok wel es te onpas bruukt in ruil veur et
binnenslepen van de jaorlikse en tussendeur ok wel es projektmaotige
subsidiestromen deur PJ. Hoe PJ d'r veurig jaor uutraekt en SB tot
direkteur promoveerd is he'k (nog) niet uutzocht mar et past as
puzelstokkien wel aorig in et gehiel. Et is now dan ok niet meer et
Stellingwarfs taelinstituut mar kotweg et Bloemhoff-instituut. Al
eerder he'k schreven dat et bi'j zwaor subsidieerde stichtings, deur
mekeer gebrukelik is dat zoe'n 15 tot 20 percent van de centen bruukt
wodden veur et overaende holen van de stichting en zoe'n 80 tot 85
percent uutgeven wodt veur de doelstelling waor de stichting veur
staot. Bi'j de sSr was dat deur de jaoren henne roegweg altied krek
aandersomme, 80 percent loon- en orgenisoasie kosten en twintig percent
veur de doelstelling. Pottefuliehoolders en baentiesmannen van de
gemienten staon toch al niet bekend om heur deurtastend optreden over
zaeken waor ze vaeks gien verstaand van hebben en vunnen et bliekber
allemaole best, as d'r mar niet al te vule gezeur over was.
De krisis
Et kluppien schrievers mit et volledig uutwarkte plan van 'de naacht
van et Nedersaksisch gedicht' leut et d'r niet bi'j zitten en stapte
naor et bestuur. Nao ampele overwegings over en weer wodde d'r een
vergeerdering belegd mit alle betrokkenen. De perciese woorden die daor
valen binnen bin now even niet zo slim van belang mar et kwam d'r op
daele dat et een kwessie wodde van wi'j d'r uut of zi'j d'r uut. An de
iene kaante (de meerste leden van) et bestuur en et kluppien
schrievers, en an de aandere kaante de direktie en staf (SB en HB).
Bi'j slot van zaeke hebben de bestuursleden et onderspit dulven. Hoe
zol dat ok aanders? Een bestuur die zels - weliswaor mit uutzondering
(GBD) - niet al te vule mit et Stellingwarfs op het en d'r eins alliend
veur opsmuk en et lintiesknippen zit, zonder de boom van alle kennis
(HB; Gen 2:9). Et besluut was neumen, et bestuur was valen en dus
hawwe... krisis bi'j et instituut! De volgende vraoge was doe drekt al,
hoe mit die krisis omme te gaon? Om dit verhael op disse meniere naor
buten te brengen of naor buten lekken te laoten kon vanzels eins niet.
Veur de bestuursleden bi'j slot van zaeke niet zo slim van belang mar
et zol et instituut alliend mar schae toebrengen en daor het gieniene
wat an; lees: et Stellingwarfs niet en SB+HB niet. Staonde de
vergeerdering wodde besleuten dat et mar et beste was om et 'onder de
pette' te holen, gieniene zol d'r naor buten toe over praoten, DD zol
ingaonde drekt (1/4) om persoonlike reden opstappen en de aandere
bestuursleden zollen heur in de kommende jaorvergeerdering niet weer
beschikber stellen. Iene man (JN) bleef trouwens an zo dat et niet al
te slim opvalen zol dat et hiele bestuur opstapt was. De beste man zal
et zels toch wel deur hebben dat hi'j daor now warkelik hielemaole veur
Jan mit de kotte aachternaeme zit? Ik hadde al disse meensken trouwens
wiezer hebben wild. Zo'k 'onder de pette' holen warkt vanzels niet - en
gelokkig mar - aj' daor mit meer meensken bi'j betrokken binnen. Een
Chinees spreekwoord zegt: aj' stelen willen dan moej' dat altied
alliend doen.
<interviews/wederhoor: DD, GBD, SB+HB>
"Et is nog nooit, nog nooit zo duuster west of et wodt altied wel weer
locht", zong Ede Staal jaoren leden in et Grunnings. Dit vreselik mooi
en uutwarkte plan de 'Naacht van et Nedersaksisch gedicht' is in et
waeter valen, de veertig (!) veurdregers uut eigen wark bin ofzegd, et
enthousiaste kluppien schrievers is veur schut zet en et Stellingwarfs
het d'r in et algemien slim klappen van kregen, alderdeegst blauwe
plakken van oplopen. Alle veurige bestuursleden van de sSr hebben d'r
bliekber al die jaoren gewoon veur joker zitten en et zal alle kommende
bestuursleden dan ok niet aanders gaon. Ik weenske de ni'je
bestuursleden Ype Dijkstra (vz) en Atty Nijboer (lid) krek as de
aandere leden van dit bestuur nog een mooie tied toe...
Et dilemma
Naost dat zoks veur alle betrokkenen een vreselike drama is, was et
veur mi'j de vraoge wa'k d'r mit an mos. Mi'j ok mar wieselik
stilleholen en alles op zien beloop laoten of d'r mit veur de draod, et
'An de liende' te hangen. Nao een peer ure 'in de hangmatte' is dit et
wodden: An de liende d'r mit. Een stichting (sSr) in oonze kleine
Stellingwarfse (tael)gemienschop waor zovule gemienschopscenten
(miljoenen deur de jaoren henne!) in ommegaon dat uutaendelik alliend
mar een goedbetaelde hobby veur een peer meensken oplevert kán
neffens mien gevuulte niet en mág niet bestaon (blieven). Et
bestuur hadde d'r in mien ogen beter an daon en hadde et bien mar stief
holen, laot et d'r dan mar op an kommen. Een goed bestuur mit een
protte vri'jwilligers die et Stellingwarfs op et goeie plak, nl. in et
hatte zitten hebben in plak van in de pottemenee is neffens mi'j meer
weerd as ten koste van alles de boom van alle kennis (HB; Gen 2:9) in
ere te holen.
© Piet Bult, 14-07-2008
Dit stok is mit mien toezegging van bescharming van verschillende bronnen tot staand kommen.