Kaortspullegies

Weeromme naor Essays
Weeromme naor Stellingwarfs
Home


Kaortspullegies

Een deuze vol mit kaortspullegies deur Piet Bult dd. april 2003 (Copyrighted).
 (Zie ok mien eerder (tiedens opfriskursus) inzunden woordspullegien)

Doe ik mien taelspullegien inleverde tiedens de opfriskursus, kree'k et gevuulte dat d'r wel es slim verlet wezen kon van dit soorte van woord-spullegies. De weeks daorop kree'k nog wat insperaosie veur et bedaenken van een stok of vieve (een deuze vol) van zokke woord-spullegies.

Naost et bedaenken van de basis-riegels zo'k ok best betrokken wodden willen bi'j et naoder uutwarken van dit idee. Van te verwaachten omzetten he'k gien verstaand krek-zo-min as van subsidiepotties. Jim hebben die kennis vast wel in huus en d'r bin vast wel speciaole potties veur te vienen wegens et hoge edukatieve gehalte.

In al disse spullegies wodden kaorties bruukt mit Stellingwarver woorden, gebeurtenissen, bekende-naemen o.d. Vaeke staot op et zelde kaortien of op een komplementerend kaortien de Nederlaanse vertaeling tegenover een Stellingwarver woord. Van dat soorte kaorties mit woorden he'k ongeveer vuufduzend woorden in beide taelen elektronisch klaorliggen. Ze moe'n hier-en-daor nog wel even naokeken wodden.

Wie wet, heur ik d'r nog es wat van.

Mit vrundelike groeten,
Piet Bult



Uni-kaorten

Et tal meugelike speulders:
Allienig of mit meer.

Waj' neudig binnen:
Woordkaorties (een hiele protte) mit Stellingwarver woorties evt. mit een lidwoord.

Speulriegels:
Leg de kaorties in vier (of vuuf) staepelties veur je op een taofel mit et woord an de zichtbaore (boven) kaante.
Kieze elkekeer van iene van de staepelties een woordkaorte en maeke mit de verschillende kaorties die aj' van een staepeltien ofkriegen, een zo lange meugelike stellingwarver zin.
Aj' een zin(negien) klaorhebben dan maj' an een ni'je beginnen.
Deurgaon tot dat alle kaorties opbruukt binnen of zoelange deurgaon daj' gien zinnegien meer maeken kunnen.
Een kaortien mag veuran of achteran ansleuten wodden. D'r niet tussenin frummelen dus.
Een kaortien wat ienkeer daelelegt is, mag niet meer verlegt wodden.

De winner:
Hoevule zinnen hej' maekt?
Wat is de langste zin die aj' maekt hebben (hoevule kaorties/woorden)?

Variaosie:
Aj' gien woorties die bovenan liggen bruken kunnen veur jow zinnegien dan maj' dat kaortien weer onderan een staepeltien terogge leggen.
Hoevule kaorties/woorden hol ie over?



Duo-kaorten

Et tal meugelike speulders:
Allienig of mit een peer.

Waj' neudig binnen:
Een hiele protte woordkaorties mit Stellingwarver woorties evt. mit een lidwoord. 't Meugen ok kaorties mit kotte zinnegies wezen.
Lieke vule woordkaorties mit Nederlaanse woorties evt. mit een lidwoord. 't Meugen ok kaorties mit kotte zinnegies wezen.
De betekenis van de Stellingwarver en de Nederlaanstaolige kaorties moe'n percies geliek wezen.
De aachterkaante van de kaorties mit de geliekese betekenis Stellingwarfs / Nederlaans moe'n geliek wezen en aanders as de aandere geliekese stellegies. Ze kunnen ok per stellegien nommerd wodden.
Van sommige woorden bin mischien wel meer vertaelings meugelik. In dat geval moe'n d'r dan een even antal maekt wodden.

Speulriegels:
Schudde de kaorten goed deurmekeer. Leg ze mit de woordkaante zichtbaor deurmekeer op taofel.
Zuuk (omstebeurten) twie kaorties bi'jmekeer waorvan et woord (of kot zinnegien) et zelde betekent (Stellingwarfs / Nederlaans).
Dri'je die twie kaorties omme.
As de aachterkaanten van die beide kaorties geliek binnen (of et zelde nommer hebben) dan hej' 't antwoord goed en maj' de kaorties veur jow op een 'eigen' staepeltien leggen.
As de aachterkaanten niet geliek binnen dan hej' 't antwoord fout en moej' de kaorties op et zelde plak terogge leggen waor aj' ze wegneumen hebben.

Winner:
As alle kaorties opneumen binnen en op een 'eigen' staepeltien liggen, dan is et spul oflopen. Wie de meerste twielingen opneumen het is de winner.



Trio-kaorten

Et tal meugelike speulders:
Allienig of mit meer.

Waj' neudig binnen:
Een hiele protte kaorties die altied mit z'n drienend bi'jmekere heuren, zo as bv.:

Kotte beschrieving              / Titel                                 / Naeme
----------------------------------------------------------------------------------
Twelf vertaelde verhaelen   / Verrassend Stellingwarfs / Johan V.
13 Streektaelen beschreven / Taal in stad en land         / Henk B.
Schrieversronte                    / Heufdmitwarker              / Pieter J.
Stichtinsbestuur                   / Veurzitter                         / Simon ter H.
-----------en-------------------/----------zo-------------------/----veerder---


De aachterkaante van de drielingen moet per drie geliek wezen en ofwiekend van de aandere drielingen. De aachterkaanten kun ok geliek-nummerd wodden.

Speulriegels:
Schudde de kaorten goed deurmekeer.
Leg de kaorten mit de leesbaore tekst zichtbaor naor boven mar wel zo dat ze in drie staepels liggen; iene staepel mit (naor et veurbield) mit alle kaorten van 'Kotte beschrieving van een boek', een twiede staepel mit 'Titel' en de dadde staepel mit 'Schriever'.
Elke mitspeulder nemt op zien beurt elke keer drie kaorten op; van elk staepeltien iene.
Bi'j de volgende beurt kuj' iene, twie of drie kaorties ruilen om zo an komplete trio's te kommen.

Winner:
As alle kaorten uut de pot opneumen binnen dan het degene wunnen, die de meerste (goeie) trio's het.





Kwat-kaorten
 (Kwartetten)

Et tal meugelike speulders:
Twieje of meer.

Waj' neudig binnen:
Een hiele protte woordkaorties mit mit stellingwarver woorden, gebeurtenissen of bekende meensken, schrievers mit boektitels enz. in groepies van vier-tallen.

Spulriegels:
Sprekt veur heurzels want et is krek as et overbekende 'kwartetten.

Winner:
Zie: Spulriegels.




Kwinte-kaorten

Et tal meugelike speulders:
Twieje of meer.

Waj' neudig binnen:
Een hiele protte woordkaorties mit mit stellingwarver warkwoorden en kaorties mit de verschillende persoonsvormen van die warkwoorden.

Spulriegels:
Schudde de kaorties goed deurmekeer.
Leg de kaorties in vuuf staepelties naost mekeer op de taofel.
Omstebeurten maj' ien kaortien van een willekeurig staepeltien ofnemen mit as doel om een riegel van vuuf persoonsvormen van ien woord kompleet te kriegen.
Aj' an de beurt binnen en dan gien kaortien -dat bovenan ligt) bruken kunnen veur jow zinnegien dan muj' iene van jow eigen staepeltien ruilen mit iene van een willekeurig staepeltien.

Veurbield:

LOPEN

Ik loop
Ie lopen
Hi'j lopt
Zi'j lopt
Et lopt
Zi'j lopen
Jim lopen
Wi'j lopen

Variaosie:
Riegelties maeken van warkwoorden in de verschillende tiedvorms:

Warkwoord                : Lopen  (Lopen)
Verleden tied              : Leup    (Liep)
Voltooid verleden tied: Lopen  (Gelopen)

Winner:
As alle staepelties opmaekt binnen of de speulders kun gien riegels mit warkwoordsvormen meer maeken, dan is et spullegien oflopen en het degene mit de meerste vuuftallen wunnen.