Edu-peraobel
Weeromme naor Essays
Weeromme naor Stellingwarfs
Home
Edu-peraobel
Hi'j sprak graeg in peraobels, gong tussen de mennigte zitten en zette uut aende:
D'r weren es twie boeren...
De iene hadde een hiele lappe onlaand en wol die tot tuun anmaeken.
Eerst mos et stok grond ommespit wodden en dan mossen d'r zaoties en
plaanten in van wottels, bieten, wat rebarber, slao, een hoekien
eerpels en gao zo mar deur. Hi'j zocht as eerste om een adviseur mit de
vraoge, hoe dit an te pakken. Die gaf et advies om et wat brieder te
trekken en d'r meer meensken bi'j an te haelen. Vule meer as al-mit-al
een man of vier, vieve konnen ze niet vienen. Et was ok mar een klein
dörpien en alleman hadde et al zo drok mit zien eigen zaeken. Mit
zien vieren vergeerderden ze haost alle daegen over hoe et now veerder
gaon mos en kommen zol. Et iene jaor nao et aander jaor gong d'r mit
henne. De adviezen weren niet verkeerd mar... de boer is ommekommen van
honger en ellende want ze kwammen niet an 't spitten toe.
De aandere boer hadde krek zoe'n lappe onlaand mar vreug de buurman om
him even te helpen. Ze overlegden even over de anpak en gongen
aanderedaegs vot naor de winkel om zaod, een verscheid an plaanten en
een peer beste schoppen an te tugen. Bi'j et ommespitten vergatten ze
niet om d'r ok drekt wat roege dong mit onder te warken. Och, ze zetten
wel es wat boonties te diepe en pootten wel es een eerpel mit de
spruten naor beneden mar och, wie daor op let... Disse boer, zien
buurman en veerder et halve dörp hadden liekwels al in etzelde
jaor meer as zat te eten uut eigen tuun.
Mar meester rabsakee, wat betekenen disse woorden? wol et volk weten.
Klotiesvolk daj'm binnen. Ik zal et jim nog ienkeer uutstokken. De
eerste boer keus veur et briede pad. Hi'j bekeek et an alle kaanten,
vreug alleman om raod en iederiene hadde inbreng van goeie idenen mar
et schikte heur now even niet om mit te helpen. Et pad wodde hoe
langer, hoe brieder. De boer was opiens et zicht en et overzicht kwiet
en verdwaelde in et subsidielaand van baentiesmannen.
De aandere boer toonde daodkracht. Niks iewig lullen en ommetiezen in
een doolhof van regels en meugelikheden mar investeren. Investeren zo
hi'j daon hadde in een goeie buurman, een goed stok ark en goed zaod en
plaanties. Aj' zoks veurenneer hebben dan hoej' niet altied
vergeerderings om te weerhaelen wat d'r de veurige keer allemaole
beproat is mar hej' wel eten zat en kun d'r alderdeegst nog van
votgeven.
Opiens kwam d'r iene uut de mennigte en dee een stap naor veuren. Mar
rabsake, ik hadde wat graeg helpen wild mar ik mos eerst mien eigen
tuun omme hebben en ik mos eerst de baand van de fiets plakken en ik
mos eerst takkebossen sjouwen. Mar ik zegge jow, ik hadde jow wat graeg
mithelpen wild.
Mar ik zegge jow: et is makkeliker om je eigen wark te doen as een
aander te helpen die ok alles niet alliend kan. De man van goeie wil
dee de ogen dichte, de hanen in de buse en vul van de weerommestuit op
'e grond daele.
De meester dri'jde him weer naor de mennigte en zee: die oren het waoj'
mit heuren kunnen, die luustert, en die de ogen niet in 't gat zitten
het die kikt es wat veerder om him henne en as zien neuze lange is. Et
wodde duuster en et wodde weer locht. Et dadde jaor nao et eerste en
nao et twiede, gong henne...
Ofwel: et zuken naor meensken om mit te helpen EduStellingwarfs in de
locht te kriegen en te holen, hoolt argens op. Die tied is onderdehaand
anbreuken. As d'r gien dringende reden te bedaenken binnen waoromme we
op disse toer veerder breiden kunnen dan hoolt et langzeman op...
© Piet/er Bult