Uut et i-dagboek van Johan V.

Weeromme naor Essays
Weeromme naor Stellingwarfs
Home


Uut et i-dagboek van Johan V. (23-12-2003)

23 december - Piet Bult zee vleden weke tegen me dat hi'j twie dingen doen gaon kon: een alternatieve Schrieversronte oprichten of de biebel in 't Stellingwarfs vertaelen. Ik hebbe angeven dat et laeste et beste is. Gien verstaandig meens zit op een Schrieversronte-scheuring te waachten en een karkscheuring meer of minder maekt niks uut. Hi'j wol een komputer-vertaelpergramme et eerste wark doen laoten. Bliksem, docht ik, as dat dan mar goedkomt. Eregister kree'k veur de aorighied een vertaeling van Genesis 19 over Sodom en Gomorra. Een fleurig begin om de biebel te vertaelen! Now zal zoe'n komputer best wel een protte kunnen, mar d'r roegelt vernederlaanst Stellingwarfs uut. Die vertaeling moet now woord veur woord, zin veur zin, mit et rooie potlood in de anslag, deurvrot wodden en dan moet d'r goed, geef, lekker lopend Stellingwarfs van maekt wodden. Een drege klus. Een klus van jaoren de huud d'r op zetten. Mar wat zol dat? Et hoolt je van de diek. Dr. Henk Bloemhoff is ok al jaoren mit et Stellingwarfs Woordeboek an 't schrieven en ie heuren d'r nooit van dat die man ondocht uuthaelt of een alternatieve Schrieversronte oprichten wil. Dat Bult moet d'r mar mooi mit deurgaon. Mar dan wel allemachtig de poggel d'r op! Et moet goed. Aanders hoeft et niet. Is 't zels vule beter dat et niet gebeurt. Half wark zit gien meens op te waachten. 

*

Uut et i-dagboek van Johan Veenstra (5-10-2005):

Mar… in de veerte hangen donkere wolkens! Want now zeggen een peer geleerden dat iene aanders schreven het wat tot now an toe an Shakespeare toeschreven wodt. Now, da’s me ok een mooi spul! De schrik slat me om et hatte. Stel je now toch es veur dat ze laeter mienen dat mien poerbeste romans schreven binnen deur Peggy Klinkhaemer of de, neffens de Liwwadder Kraante dissidente, Stellingwarver biebelvertaeler Piet Bult… Gruwelik!