Naor Dagboekien
Veurige weke Ankem weke
*
Weke 34 (22 – 28 augustus 2005):
*
Et
fesien, tegere mit et Fryske Gea en de prissentaosie van oonze Wieshied
uut de Biebel in et Stellingwarfs bi’j et arkje van Rink van der Velde
op ‘e Veenhoop (bi’j Drachten) is op de 24ste september om 10:30 ure.
Ha’k jow ok al vraogd om te kommen? Wees welkom… Vanwege de ‘hapjes en
de drankjes’ is ’t misschien wel goed om je even an te melden.
*
D’r wodt zo now en dan ok al es vraogd waor dat ‘arkje’ van
Rink van der Velde dan wel ligt. Now dat is halverwege an de Drachtster
Heawei in De Veenhoop. Ie rieden et makkelikste van Drachten – De
Wilgen – naor De Veenhoop of aandersomme vanzels (stiet allemaole wel
angeven). Tegen die tied zal d’r ok wel een vlagge en wat auto’s in de
baarm(s) staon en dan kan et ‘m (haost) niet missen.
*
Zundag (28/8):
*
Et kwam mi’j vandeweke wel aorig goed uut dawwe vesite hadden omreden
ik mi’j wat inholen mos neffens mien horoskoop veur disse weke, mar in
de loop van de dag is de vesite uut Hollaand weer op huus an gaon en
kan ik wel weer wat scharper. De mannelike helte van de vesite zat ‘mit
et blote gat in de pette’ (had een kael heufd), neffens de
spreukekelinder. Et is now weer stillegies, zo mit oons beidend. Wi’j
nuumden dit trouwens iene vesite mar aj’ meer as iene vesite over de
heerd hebben dan kuj’ dat vanzels mooi mit mekeer ‘anagrammen’
(vesiten, viseten) en dan neffens diezelde spreukekelinder ‘de boek op
‘e leest kriegen’ (tevule eten), zeker.
*
Vandaege eerst de proefdrok van Wieshied naokeken op al tevule fouten.
’t Veul toe, allienig hier en daor een riegel versprongen. Et is
vanzels eins ok een vervelend boekien om te maeken mit al die twie-,
drie-, en meerriegelige vassen en spreuken. D’r zit gien lijn in.
*
Doe mien linkies even naolopen:
sSr: Hoewel de webstee veur et laest anpast is op 23/8, bin de
laeste (!) ni’jgies bin nog van juni (of eerder). Even veerderop wodden
de lezings in juni ok nog es anprezen (!) en toch ok zegd dat ze al
west hebben.
JV: Hoewel et i-dagboek veur et laest anpast is op 27/8, bin de
laeste ni’jgies eins ok al meer as een jaor (of twieje) oold. Zol iene
d’r wat van vernemen as hi’j de daegelikse stokkies van veurig jaor (of
eerder), dit jaor (en ankem) jaor opni’j bruukt…? Harry Mulisch: "Elk gedicht herhaelt alle gedichten."
*
In mien berichien van vri’jdag ha’k et over PJ zien "d’r nog mar es
over praoten". Ik zee doe al da’k et wel van meer wus, mar … dat et
zovule weren, dat kon ‘k mi’j now ok weer niet veurstellen…! Nog een
jaor of vieve deurzetten PJ, allienig … dan hoef ik niet meer mit jow
te praoten.
*
Ingeving tussendeur: "Et
gaot zo et giet en as et giet zo as et gaot dan giet et dat et zo wat
dot en as et dan dot wat et dot dan komt et zo as et komt en dat is
weer krek zoks as dat et giet zo et gaot!"
*
Vandemiddag ok nog even een goed ure naor et Bertus Lacher festival in Noorwoolde west. Ok drekt mar wat eten bi’j Oostra.
*
Ik kreeg vandeweke ok een hiele vraogeliest mit dattien vraogen.
Sufferd da’k bin, ik wus (en weet) mar ien antwoord bi’j al die
vraogen. Wie helpt mi’j even?
Vr. 1: Welke twie Stellingwarfse schrievers zatten tegere op een slaopkursus?
*
*
Zaoterdag (27/8):
*
(Deur ien of aandere (kontakt)storing, zundag eerst ‘uploaden’ kund.)
*
Vandaege mit de vesite naor de ‘top of Fryslân west’. Een kroegien
hiere en een kroegien daore. Paantien koffie, glassien bier, Lieve
Vrouwen, St. Jabik en St. Anne, ’t het mooi west. (Et liekt wel
kriptisch.)
*
Mao tse Tung: "Een dichter die gien genie is, is een idioot."
*
*
Vri’jdag (26/8):
*
Vandemorgen al op ‘e tied mit de vesite naor Zwolle west en op ‘e
Fochtel zullen ze wel zegd hebben dat ‘de sni’j in augustus bluuit’
(d’r bin dikke, witte wolken).
*
Et eerste wa’k vanaovend in de kraante (LC) las: "Chaos zorg door
nieuwe declaraties". Et bericht dot kond van een ni’j komputerpergramme
daor van alles wel mit kan, mar vaeke niet dot wat warkelik van belang
is. Dit verschiensel komt mi’j bekend veur. Slimmer nog, ik hebbe de
laetse tied nog mitwarkt an zoe’n soorte systeem daor et veurtouw in
neumen is deur een ministerie. Ok een belachelik dom systeem wodden…
*
Homesueel Dales wet precies te vertellen hoe aj’ (Antilliaanse) kiender opvoeden moeten…!
*
Zo now en dan krieg ik een aemel en moe’k es weer uutleggen waorom as
et tussen de sSr en mi’j, bliekber niet ‘klikt’. En de hieltied vertel
ik et verhael van een PJ die (as d’r meer meensken bi’jbinnen) zegt "We
moe’n et d’r mar es even een keer over hebben." As de ommestaonder vot
binnen, heur ik d’r nooit weer wat van. Ok vertel ik mennigmaol et
verhael van een PJ die (as d’r meer meensken bi’jbinnen) zegt "We moe’n
mar es even een keer rond de taofel." As de ommestaonder vot binnen,
heur ik d’r nooit weer wat van. Now ja, en zo he’k onderhaand
(letterlik en figuurlik) een boek vol verhaelen. Dezelde verhaelen heur
ik trouwens ok hoe langer hoe vaeker deur aanderen vertellen mar ja,
die moe’n heur eigen verhael(en) mar vertellen.
Inzunnen:
"Omdat ie ‘et hatte hebben’: "De wijze houdt zichzelf op de achtergrond, maar in werkelijkheid staat hij vooraan.""
Ok uut een aemel: "Ge leeft eenzaam en onbeloond omdat ze beducht zijn voor uw grote waarde !!"
Daor hool ik mi’j now mar een posien an vaaste want d’r bin gelokkig ok nog meensken die et wel begriepen…!
*
*
Donderdag (25/8):
*
Vandaege de hiele dag op Amelaand
ommesleugen. Een mooie dag en iene dikke bujje regen had. Nao wat
bescheid geven op de aemels van vandaege gien tied meer over veur lange
verhaelen. Aandere keer (weer) meer…
*
Inzunnen deur JvA: "De droom is een vrouw die praoten moet, de slaop is een echtgenoot die in stilte lidt."
*
*
Woensdag (24/8):
*
Vandaege hewwe vesite uut Hollaand over en die blieven een peer daegen dat et zal hier wel een dag of wat, wat ‘piano’ an gaon.
*
De boekekraante lag ok in de brievebusse. Daor ha’k ‘m ok wel blieven
laoten kund. Wat een suterig kraantien. Ik hadde ok een adverteensie
anbeuden. Ston d’r ok niet in… Even laeter belde Klaas van W. om te
vraogen a’k ok mitgong te sutelen. Drie keer raoden wat mien bescheid
was. Xxxbrbrbb bbgggg b bgbg bbb xxx, zeg ie? Ie meugen nooit weer
raoden!
*
E.Pound: "Dichters drinken van 't leven zoas pattie aandere meensken wien drinken."
*
*
Deensdag (23/8):
*
We kregen vandaege de drokproef binnen van Wieshied. Zicht d’r (weer)
prachtig uut. De ofronde hoeken geven d’r een hiel appat ‘cachet’ an.
Tot et weekaende za’k d’r nog even naor kieken en dan kan ’t mar los
mit de geit.
*
Vandaege he’k in ’t Vaticaan eten. Nee, niet in ‘t Vaticaan in Rome mar
et Vaticaan an ’t Grootzaand in Sneek, en ik kan me niet veurstellen
dat ze in et echte Vaticaan lekkerder eten… heerlik, heerlik, heerlik.
Ik mos even in Sneek wezen omreden we een laser-mesiene verhuzen
mossen. Naost et mooiste berduurwark (o.e. naemen, spreuken en zoks op
petties, sjaals, jassen, mussies, buusdoeken, e.z.v.) kuwwe mit ’n dag
ok weer de mooiste laser-applikaosies (in spiekerstof of fleece)
branen. Veur meer infermaosie www.borduurcentrum.nl
Applikaosie stiet niet in de Dikke, mar et oer-Stellingwarfse applaus,
applausmesiene en applausmeter wel…! Snap ie et? Snap ik et ok (niet).
Apperdepo stiet d’r wel twie keer in.
*
Wie kan mi’j es uutleggen waorom as d’r in pattie sporten zo mal teld
wodt. Bi’j et Friese ‘keatsen’ (jeu de pelote) is ’t riekaans wel wat
hiel overdreven mal mar bi’j’t tennis kun ze bliekber ok niet gewoon
tot tiene tellen. Nee, vuuftien, dattig, veertig en ‘juce’. Bi’j et
peerdespringen tellen ze vier strafpunten as d’r een balke ofdonderd,
viere achte, twaelf en gao zo mar deur, waorom niet gewoon iene,
twieje, drieje? En as ’t dan geliekspul is dan gaon ze in sekonden
veerder mit ‘t tellen. Mit een spullegien ‘darten’ bi’j niet de beste
aj’ de hieltied krek in et ‘bulls-eye’ in ’t midden mikken, nee, dat
zol te makkelik wezen. Et moet mit twintig en zestien en weet ik wat,
op en daele en… gek woj’ d’r van, en dan he’k et nog niet iens over
‘bridgen’!
*
Neffen de ni’jgies op de webstee van de sSr is de Ovend van juni nog de
hieltied de laeste uutgifte van de Ovend…! En ’t gong zo goed, de
laeste tied… Zol d’r wat an schelen…?
*
O, dat ik in zijn armen lag
één onder mijn hoofd
één over me heen
en dat ik zijn ogen
boven me zag!
Ik zeg jullie met klem
Jerusalemse meisjes
zet niet tot liefde aan
laat haar vanzelf ontstaan.
Judith Herzberg
uit: '27 liefdesliedjes' een bewerking van het Bijbelse 'Hooglied'
*
Vandaege een inzunnen spreuk (JvA) van Rabindranath Tagore (7 mei 1861
– 7 augustus 1941). Hi’j kreeg in 1913 de Nobelpries veur Literetuur: "Rook bluft tegen de hemel, en As tegen de aarde, dat ze broeders zijn van het Vuur."
*
*
Maendag (22/8):
*
En alweer bliede dat et weer maendag is… Noord-Hollaand in west, Breezaand en Heiloo.
*
Et oflopen weekaende he’k 2 Keunings roegweg klaorkregen (nog twie keer
deurlezen veur da’k ‘m in de groep gooi) en bin ‘k an 2 Korinthiës
begonnen.
*
Ik wodde (deur JvA) opmarkzem maekt op de "27 liefdesliejes" van Judith
Herzberg. Daor mos ik vanzels drekt even naor kieken. De naeme ha’k wel
es heurd, mar ik kende heur wark niet. Uut de bieb weg he’k disse
alvaaste even naor huus aemeld:
Samen slapen
Je zoenen zijn zoeter dan
zoeter dan honing en ik vind je
mooier en liever, liever
en aardiger nog dan de koning.
We gaan samen liggen
een eind hiervandaan
we maken van takken
van takken en blaadjes
een vloer en een dak,
dat was onze woning
of ik was het tuintje,
en jij was de tent
daar gingen wij wonen
en blijven en horen
o rep je mijn liefje
ik heb je zo graag
nu of nooit samen slapen
want we zijn er
alleen maar vandaag.
Judith Herzberg
uit: '27 liefdesliedjes' een bewerking van het Bijbelse 'Hooglied'
*
*
Harry Mulisch: "Elk gedicht herhaelt alle aandere gedichten."