Naor Dagboekien

Veurige weke Ankem weke
*
Weke 23 (6 – 12 juni 2005):
*
Zundag (12/6):
*
Vandemorgen eerste es wat oolde aemels ofhandeld. Deur de drokte van de laetse daegen, zeg mar laeste weken of alderdeegst al maonden, weren d’r al een stokmennig dingen en deengies haost wat te lange liggen bleven. Misschien is mi’j d’r nog wel iene ontscheuten mar ik geleuf da’k now weer aorig bi’j bin.
*
Veerder de hiele dag wat an ’t vertaelen west mit et evangelie neffens Johannes. Dat vertaelen wodt trouwens ok al haost ‘gewoon’ wark. Ik raekte nog in een diskussie over et verschil tussen een losblaedig systeem of een biebel waor de bladzieden een gattiesraand hebben, zodaj’ ze d’r makkelik uutscheuren kunnen. Now vien ik een losblaedig systeem trouwens wat te vri’j. As ’t je even niet past dan hael ie die bladziede d’r uut en aj’ tot een aandere inzicht kommen dan leg ie ‘m d’r mar weer tussen. Nee, dan toch liever bladzieden mit een gattiesraand. Daor wodt dan neffens mi’j toch even langer over naodocht (mit in de hangmatte legen, zol ik zeggen), want ja, ien keer d’r uutscheurd blift d’r uutscheurd.
*
Tussendeur nog even naor Et Vene west om een HD. O ja, en vandemorgen even naor RWC in Noordwoolde vanzels. Et duo De Vries en De Vries maekten weer een uutzending van Huus en Hiem. Ze hadden een mooi stel vrouwluden te gaasten.
*
*
Zaoterdag (11/6):
*
Vandaege een betien an ’t wark west, een stok of wat heufdstokken van et evangelie neffens Johannes deurvrot en tussendeur de schure opruumd. Dat laeste was al haost een jaor of tiene niks an daon. ’t Was ok al haost tien jaor leden da’k d’r veur ’t laest west was.
*
Et boek (biografie) van mien breur Anne "Inzoemen op herinneringen" mit de ondertitel: "Een Stellingwerfse Fries om utens" is hielendal klaor. Op 24 juni om 15.30 uur zuwwe d’r argens even een fesien omhenne bouwen. De tied is al bekend, et plak nog niet.
*
Vri’jdag (10/6):
*
Vanaovend moch ik nao et ni’js van zes ure even bi’j RWC opdraeven om oonze brief naor alle raodsfrakties van Oost- en Westaende even uut te stokken en toe te lichten.

*
Naotied bin ‘k even bi’j mien kammeraod (oold-autoverkoper) an west en doe biwwe gezellig de hiele aovend ‘uut west’. En dat giet jim lekker niks an.
*
*
Donderdag (9/6):
*
Vandaege weer drok, drok, drok an ’t wark west. Gisteraovend kreeg ik zomar opiens een Hoogeveense biebelvertaeler via oonze webstee over de heerd. De beste man vint et midden-Drents niet goed genoeg om daor in Hoogeveen lekker mit veuruut te kunnen. Hoe zol dat kommen awwe dat hier in de Stellingwarver ok zo doen zollen, zat ik mi’j of te vraogen. Op zien meenst een groot verschil tussen Oost- en Westaende mar riekaans moet ieder dörp alderdeegst een eigen biebel hebben. In ’t uterste geval alle meensken, ieder veur zichzels. Dan kun ze krek as mien kammeraod Johan al es veursteld het in zien Klunderen, d’r zels wat moois van maeken mit homesuelen, zonder homesuelen en mit of zonder vrouwvrundelike bladzieden. Misschien moe’we, awwe klaor binnen ok mar een peer boeken maeken mit in iedere bladziede een perferaosie krek as bi’j de postzegels, dan kan ieder d’r mar uutscheuren wat hi’j (m/v) d’r niet in hebben wil.
*
De verhaelen uut de Biebel in een tiedbalke (vervolg op deensdag 7/6).
Rond de 14e ieuw v.Chr. was d'r de slaverni'je in Iegypte, de geboorte van Mozes, opstaand, uuttocht uut Iegypte (ong. 1300). Beschreven in de eerste vuuf biebelboeken (veur de Joden: de wetten).

Rond 1260 v.Chr. et begin van de intocht in Kanaän, onder leiding van Jozua. De Israëlieten troffen daor een beheurlik ontwikkeld volk an, veur een pat nog levend in de broonstied, mit stadstaosies en een eigen alfabetisch schrift. Kennelik wodde disse beschaeving as bedriegend erveren en mos ze hadhaandig onder de doeme holen wodden.
*
Op et webstegien van de sSr isd’r vandeweke ok al weer wat bi’jzet. Ik geleuf dat et om et onderste stokkien gaot en dat is vanzels niet haandig. Aj’ d’r even kieken willen en ie zien drekt niet dat d’r wat veraanderd is dan gaoj’ mar weer en dat is vaaste niet de bedoeling. Dus webmaster: zet anvullings altied bovenan asjeblief.
*
*
Woensdag (8/6):
*
Aendelik es weer tied om wat te vri’jwielen vandaege. Om goed vuuf ure (vandemorgen!) zat ik al beneden an de koffie en zwaore sjek. Om halfzeuven bin ‘k votreden en rond acht ure zat ik bi’j Beekbergen an de koffie mit een uutsmieter en ’n gehakballe. Zo, dat was een stevig begin van de dag. Onder de koffie las ik wat in de kraante (Tillegraaf/AD) en wodde ik eerst echt goed wakker bi’j een bericht over een ‘penisklauw’ tegen anraanders en een bericht dat gong over et ontnemen van et riebewies van homesuelen in Italië. Op et eerste gezicht leek et mi’j beide wel een goeie zet toe. Doe ‘k even laeter veerder tufte in mien brikkien, he’k d’r toch es wat mit in de hangmatte legen.

In deusies van zesse kan een vrouwspersoon die penisklauw kopen veur een dubbeltien et stok. Da’s gien geld. Et ding liekt nog et meerste op een ‘maondproppien’ dat de vrouw bi’j heurzels inbrengen moet (inbrengen laoten schient … veur te komen). Moch d’r dan een vremde kerel op dat plak bi’j heur binnendringen dan zal die meraokelse pieleklauwe himzels muurvaaste vaaste bieten an de binnendringer. Et ‘ding’ kan allienig deur een betien dokter losmaekt wodden. Wat d’r niet bi’j ston was dat de vrouw bi’jglieks bi’j een groepsverkrachting wel even de tied kriegen moet om een ni’jeniene ‘in te doen’ en de groep mag in dat geval, vanzels niet uut meer as zes man bestaon (as ze temeenste mar ien deusien vol bi’j heur het). Now ja… ‘k weet niet, as dit de oplossing is…? En wat as d’r daegs niks gebeurd is en ze hoolt et ding aovens op bedde (per ongelok) in…? Auwwwww… ikke, aarme ikke…….

Dat aandere berichien he’k meer fedusie in. Alle homesuelen (m/v) et riebewies ofpakken. Dat ze neffens et bericht niet zo goed rieden kunnen as hetero’s en bi’s en ‘wat al dies meer zij’, liekt mi’j mooi mit neumen mar ik zie et meer as een eerste stap om (mit daank an een vraoge van Jan an Lieve Rita) o.e. ok et fileperbleem mit an te pakken. En moch et zonder homesuelen dan nog de hieltied te drok wezen dan zuken we gewoon nog een bepaolde soorte uut. Bi’jglieks politici en allerhaande baentiesmannen of stomme schrieverties en aander keunstemaekersvolk Stok veur stok et riebewies ofnemen en dan bin ik d’r wis van dat et d’r een keer van komt. Ikke, ieje en nog een peer aanderen, zullen de weg weer veur ‘oonszels’ hebben…
*
*
Deensdag (7/6):
*
Vandaege al weer hadde an ’t wark west en de riolering hewwe vandaege ok ansleuten. Now ja…, ik hebbe de hulpstokken haeld en een aander (die dat vule beter kan as ikke) het et ansleuten. Morgen zal hi’j de bestraoting nog even veerder of maeken (hoop ik).
*
Ik hebbe mien kammeraod Johan d’r now niet over heurd mar die Riekele en Tynie in Ni’jehooltpae hebben ok nog een hiel oold karke-archief in oolde deuzen, he’k wel es heurd. Die zol toch eins es netties uutpluusd en toegaankelik maekt wodden moeten, neffens mi’j. De oolde man (ome Bertus) waor as zi’j et huus ‘van over holen’ hebben, daor he’k hiel vroeger (rond 1955) wel es mit te jaegen west. Een betien jaegen en wat imkeren, was de man zien lust en leven. De hond Juno gong nooit iene meter bi’j him weg.
*
De verhaelen uut de Biebel in een tiedbalke.

We leven now roem twieduzend jaor nao Christus zien geboortejaor. Haost liekelange daor weer veur beginnen de biebelse verhaelen over de 'aartsvaders'.

Rond de 17e tot de 15e ieuw v.Chr.: De 16e ieuw wodt meerstal beschouwd as de tied van de aartsvaders: Abraham, Isaak en Jakob. Abraham, leider van een nomaden stamme, migreerde vanuut Mesopotamië naor Kanaän, et gebied an de westkaante van de Jordaan. Hi'j anbad een god die ze doe de 'God van Abraham' nuumden. De daorbi'j heurende kultus wodt seins as de oorsprong van et jodendom zien. Hongersnood dwong et volk doe om veerder te trekken naor Iegypte, waor et nao schoffien tot slaverni'je dwongen wodde.

*
Wie kan mi’j trouwens vertellen wat een ‘Sabbatsreize’ eins is? Is dat 1 (iene) Km of is et de ofstaand diej’ lopen op 1 (iene) dag?
En wat is now weer (in ’t Grieks) een ‘Tetrarch’? Is dat (in ’t Nederlaans) een ‘Vorst’ of (in ’t Latien) een ‘Prins’ en dus (in ’t Stellingwarfs dan) een ‘Vost’, Keuning’ of ‘Preens’?
*
*
Maendag (6/6):
*
Vandaege eerst mar es even weer flink an ’t wark west. De vertaelersgroep het aovens drok in de weer west mit Job. Die is klaor- en an de Spreuken biwwe niet toekommen.
*
Mien kammeraod Johan perbeerde et gister wel een betien 'naor zien haand te zetten'. Gister schreef hi'j in zien dagboekien: "...mar et staot in ieder geval op pepier en ‘wat geschreven staat, staat geschreven,’ zee Pilatus!" Mar... in de NBG-51 (de NBV zal Johan riekaans niet in huus hebben) in Johannes 19:19-23 stiet "En Pilatus schreef ook een opschrift, en zette dat op het kruis; en er was geschreven: JEZUS, DE NAZARENER, DE KONING DER JODEN. 20 Dit opschrift dan lazen velen van de Joden; want de plaats, waar Jezus gekruist werd, was nabij de stad; en het was geschreven in het Hebreeuws, in het Grieks, en in het Latijn. 21 De overpriesters dan der Joden zeiden tot Pilatus: Schrijf niet: De Koning der Joden; maar, dat Hij gezegd heeft: Ik ben de Koning der Joden. 22 Pilatus antwoordde: Wat ik geschreven heb, DAT heb ik geschreven. 23 De krijgsknechten dan, als zij Jezus gekruist hadden, namen Zijn klederen, (en maakten vier delen, voor elken krijgsknecht een deel) en den rok. De rok nu was zonder naad, van boven af geheel geweven." en dat is toch wel wat aanders as waor mien kammeraod Johan op doelde mit zien ...‘wat geschreven staat, staat geschreven,’ zee Pilatus!..., wi'k leuven. De zundagschoele niet hielendal ofmaekt zeker of de les mit klemtonen oversleugen?