Naor Dagboekien

Veurige weke Ankem weke

Weke 2 (10/1-16/1.2005):

Zundag (16/1):

Vandemorgen wa’k al veur zessen beneden. Nao et morgengebed van zwaore sjek en een protte koffie bin ‘k haost niet weer van de stoel of west. De hiele dag wat mit allerhaande brieven van Paulus in de weer west. Dat bin mooie kotte biebelboeken van een bladziede of vieve et stok. Zie, dat schöt op. En tussendeur ok al weer genoeg stof tot preken en overdaekings veur oons ‘Wiespraoten’ van ankem donderdag bi’jmekeer gadderd.

‘k Wil disse maond ok nog een gedichien (of)maeken want et is mit een dag of wat (ik mien de 29ste) ok weer nationaole gedichtedag. En we zollen disse maond ok nog bericht van Pieter hebben over een schriefkursus. Nog mar even ofwaachten…

 

Zaoterdag (15/1):

De hiele morgen hewwe wat ommeklunderd in huus. Wat stofzeugen, tegelties vaasteliemd die losraekt weren, wat kleine bosschoppies daon en een protte zitten te lezen. Et meerste in de Liwwadder en wat zag ik in Johan zien Klunderen… "De wereld wodt de laeste jaoren overspoeld mit …" Hier moet wel haost wat misgaon wezen want iedere Stellingwarver (incl. de bekendste) wet wel dat dat ‘overspuuld’ wezen moet vanzels. Et wil mi’j dan ok niet an dat Johan zoe’n misser maekt het. Zol ’t wezen kunnen dat de Liwwadder d’r mit opzet zo now en dan wat fouten in maekt om de Stellingwarvers wat te narren?

An ’t aende van de middag biwwe naor Liwwadden gaon. Hewwe gezellig een peer ure zitten te bridgen in et EuroHotel. Daor biwwe ok drekt mar bleven te diketen.

Aovens hewwe hewwe nog wat femilie-kronieken deurneumen.

 

Vri’jdag (14/1):

Vandemiddag kreeg ik onder et plakkien-bolle-eten een miezerig klein blikkien vis toescheuven. Dat blikkien he’k es wat beter bekeken en doe bleek dat et (mar) 125 gr. inhoold had. Ongeveer krek een gehakballegien dus. Et meerste(?) in ’t blikkien was ok nog tomatesaus. Vier konklusies he’k trokken: (A) Et blikkien is een vusen te dure verpakking veur zoe’n inhoold, (B) Die peer krummelties vis staon niet in verholing tot de saus die d’r in zit en (C) Wi’j bin staepelgek dawwe zokke rommel kopen. De blikkies van etzelde medel mar dan mit honde- en kattevoer bin trouwes vaeke nog vule duurder en de inhoold is vaeks nog ienvooldiger. De vierde konklusie is dan ok: (D) D’r bin pattie meensken nog vule staepelgekker dan dat wi’j binnen.

Ik daenk wel es da’k wel een aorig veurstellingsvermogen hebbe mar doe’k taovend even in de statistieken keek van de webstee van Stellingwerfs Eigen docht ik bi’j mezels: hoe kommen meensken d’r toe om mit wat veur allerhaande woorden te zuken om op disse webstee te kommen. Bevobbeld zo mar een stok of wat:
biebel, geboorteverhaal, Bibel, amos, genesis, jezus, fryske, oervloed, geschriften, hakken, karmel, orpa, visioenen, rap, brief, christus, stille, schriftgeleerden, bijbelvertaling, sara, gewichten, zwieg, kader, maegien, smyrna, hogepriesters, qohelet, sareser, veeboer, nbv, betel, nieuwe, beding, geitien, rabboeni, volk, kristal, rebekka, naacht, maeker, poerimfeest, messias, stichting stellingwerfs eigen, openbaringen, openbaringen johannes, zacharia, fryske bibel, wor of marcus, geboorteverhaal jezus volgens lucas, sara zien abraham zien, openbaringen smyrna, qohelet prediker.
De stichting Stellingwerfs Eigen wodt tegenwoordig ok nuumd tussen de nationaole en internationaole biebelgenootschoppen op Startpagina. Dat gebeurt je zo mar …


 

Donderdag (13/1):

Mit zoe’n honderd anmeldings veur de ni’jjaorskuier van Berkoop was dat een ‘overweldigend succes’, kopte de NOS. D’r ston een foto bi’j van een stellegien meensken op de Batte-brogge over de Lende. Doe ‘k dat las he’k d’r even een posien mit in de hangmatte legen want ik vien dit soorte dingen nog al es een dilemma. An de iene kaante, op een protte plakken niet meer kommen meugen omreden de netuur niet te verstoren en an de aandere kaante moet et allemaole de hieltied mar kunnen. Overal moe’n we tegenworig patties en wegen anleggen om meensken (mit te vule vri’je tied) an heur gerak te helpen. Ie zien et de laeste jaoren rondomme. Overal waor een evenement orgeniseerd wodt, kommen d’r hiele hordes volk (vaeke 50+) op of stroezen. Zol ’t niet beter wezen om in dit soorte gebieden bevobbeld gien patties an te leggen mar et wel vri’j toegaankelik te laoten? Minder riegelties van ‘niet meugen’ en et volk blift dan toch wel weg. En die peer die dan nog wel kommen, dat bin vaeke gien ‘netuur-verstoorders’ mar echte liefhebbers.

Et bedriefsleven wil een vierbaensweg van Donkerbroek naor Oosterwoolde. Toe mar jonges, naog mar meer beton en asfalt… Een posien leden belde ik mit iene en ik zee doe dat hi’j bi’j et starten van zien PC even op een knoppien (Del) op et toetsebod indrokken mos, mar dat hi’j dat wel hiel vlogge doen mos omreden et mar een tellegien op et scharm ston. Wat zegt de man: "Dan wodt dat niks want wi’j kun hier niet vlogge en we willen hier niet vlogge. Hier het al es een ‘snelle jonge’ west mar die warkt hier niet meer." Zok proat past mi’j beter as die vierbaensweg. Laot ze die mar in de ranestad anleggen; vlak naost de zweeftrein van Albers.

Nog de hieltied in dezelde kraante las ik ok dat aj’ een ni’j riebewies hebben willen/moeten veur wat meer as allienig ‘B’, daj’ dan ok steevaaste naor een dokter moeten veur een keuring en ‘een verklaoring van geschikthied’. Et wodt toch haost te mal. Nee, et is onderhaand al te mal! En dat uuttreksel van et bevolkingsregister dat d’r ok de hieltied bi’j moet he’k ok nooit begrepen. Niks aanders as geldklopperi’je, liekt mi’j.

De VVV-folder daor as de direkteur van de sSr him al een schoft veur in ’t zwiet warkt het (dat levert van ’t jaor weer minder sSr-leden op bin ‘k bange), numen ze in de Liwwadder een ‘Spoorboekje voor de Stellingwerver toerist’. De kraante durft et nao ‘Veenstra onder de Kastboom’ now trouwes hielendal niet meer an om in et Stellingwarfs te citeren. A’k op ‘e Veluwe ommescharrele bin ik een toerist en ik bin een Stellingwarver, dus een Stellingwarver toerist. Wat moet ik daor dan toch in de lieve vrede mit zoe’n spoorboekien? vreug ik mi’j of. Et zal dan ok veur toeristen bedoeld wezen die de Stellingwarven es opzuken, he’k mar anneumen. Malle meniere van schrieven hebben die jonges van de Liwadder. Daor moe’n we nog mar es een ludieke aktie over holen bi’j de kraante. Malle meniere van doen trouwes ok van de sSr in dit verbaand, mar daor he’k et hier al es eerder over had.

 

Woensdag (12/1):

Bi’j et oprumen - gisteraovend laete - van mien oolde agenda van veurig jaor kwam ik een verschrikkelik perbleem tegen: ik moet neudig es weer naor de tanedokter, zag ik. En a’k argens een hekel an hebbe… Niks tegen de man persoonlik mar et is meer et ark dat de man bruukt. Al meer as tien jaor he’k trouwes nooit wat a’k bi’j de man in de stoel zit, mar ik blief et een ‘minder prettige’ omgeving vienen en dan zeg ik et nog netties. Ik bin dan ok gewoon: kleinzerig. ‘k Geleuf da’k nog liever naor de huusdokter gao mar da’s ok al laank leden da’k daor – veur mi’jzels - west bin. En dat heur ie wel es aanders. Boven de vuuftig moej’ toch haost es wat beginnen te sukkelen, he’k wel es heurd en ik heur en zie et in mien omgeving ok hoe langer hoe vaeker gebeuren. Och, mien tied komt nog wel, za’k mar rekenen. Dat gedonder mit die tanedokter he’k trouwes wel even oplost… Ik heb ni’je gien ni’je agenda weer antuugd…

Vandemorgen al op ‘e tied naor Braobaant. Een terassien zat d’r krek niet in. Te koold. Niet veur de tied van ’t jaor (reletief), mar gewoon (absoluut): te koold. Veerder een mooie dag had mit mooie meensken om mi’j henne.
(relatief = reletief? Staot niet in de Dikke. Rilletief, wil mi’j eins ok wel an.)

Nog krek op ‘e tied weeromme om om half-aachte bi’j de radio (RWC) te wezen. Daor hadden ze een minder mooie bosschop mar d’r is nog hope. Ankem weke is d’r meer bekend.

Doe ’k om goed negen ure thuuskwam lag d’r nog een proeze wark op mi’j te waachten en daordeur blift d’r (alweer) weinig tied over veur disse schrieveri’je. En ik misse de lieties-schrief-kursus zuver al een betien. Morgen mar weer zien…

‘k Zag nog krek in de kraante (NOS) dat oonze VVV-man een mooi foldertien maekt het…;-)

 

Deensdag 11/1):

Vandemorgen bin ‘k eerst even naor Stienwiek west. Doe ‘k mien bosschoppien daon hadde he‘k een schoffien langs de oolde vestingwal ommelopen. Laank leden da’k zo mar op een deensdagmorgen wat ommekuierde in Stienwiek. Best aorig trouwes zoe’n kuiertien mit dit (veur disse tied toch eins te waarme) weer. Ik zag dat een protte meensken dezelde kuier ok maekten mar dan vaeke mit een beest an een touwgien. En dat kuj’ dan ok goed roeken en ie moe’n uut je doppen kieken waor aj’ lopen. Rond twaelf ure he’k in Stienwiek ok mar een uutsmieter eten en glas melk d’r bi’j dronken. Op ‘e weeromme reize he’k in Noordwoolde een peer karbenaden kocht veur thuus bi’j de eerpels en de bri’j. Op ‘e krusing ston een viskarre en daor he’k twie waarme vissies kocht, betaeld en votdaoliks opeten. In Berkoop wo’k nog een bloemegien kopen om ze thuus wat in een goeie bujje te brengen mar dat gong niet deur. ’t Bloemewinkeltien was (weer es) dichte. Now zal d’r thuus ok wel niks van die goeie bujje kommen, bin ‘k bange. Et gebeurt mi’j nog al es da’k in Berkoop veur de dichte winkeldeure komme. Et zullen wel luukse perblemen wezen zuwwe mar rekenen. Doe ‘k de karbenaden thuus ofgaf, rattelden daor wel twie tillefoons tegen mekeer op dat ik bin mar deurreden naor de biebeltheek om mi’j es wat op ‘e hoogte te stellen van de warking van et brein. Want ja, waorom doej’ de dingen zo aj’ ze doen? Is dat (ok al is et mar) een betien te verklaoren? Daor moe’k mittertied nog mar es een filosofisch dromeri’jgien over opzetten. De heufddirektie het de tillefoonties ofhandeld, neem ik mar an. Ik heur et vanaovend wel as d’r wat veur mi’j bi’j zat.

Morgen gao’k naor Braobaant, naor de driehoekige mark, de lange St. Jan en zo wat henne. Mit dit weer kan d’r ok nog best es een plakkien op een terassien te vien wezen in disse zudelike streken van oons laand. "Hedde gij veur mi’j ‘e ne pilske?"

 

Maendag (10/1):

Ik bin meerstal bliede as ’t weer maendag is. Niet meer dat ommehangen, mar d’r gewoon weer lekker fris tegenan. Vandemorgen dan ok al weer vroeg op pad. Een mooi klussien op ‘e Veluwe.

Ik wodde d’r vandaege in een aemel ok even op wezen da’k mien visken in et stokkien van gister, nog mar es even naokieken mos. Dat he’k dan ok even daon en de beste man had hielendal geliek (vanzels). In et Nederlaans is et beide etzelde: "Wij (vissers) vissen op vissen" mar in et Stellingwarfs is et: "Wi'j (viskers) visken op vissen." (blz. 714 / 715 S-Z). Now kan ‘k mien komputertien de schuld wel geven of mien rechterhaand mar lao’k eerst de haand mar es in eigen boezem (he’k haost niet) stikken. Et is de ‘meester(-leerling)’ dan ok slim ontkommen mar een beroemde Amsterdamse voetballer (dhr. J.C.) het al es een lieke beroemde uutspraoke daon: "elk veurdiel het zien naodiel, en aandersomme." Mit een komputer hej’ zomar een protte fouten maekt (da’s een groot naodiel) mar hi’j zet et ok lieke vlogge weer terechte (en da’s een groot veurdiel). Dat was bi’j die oolde monnikken vroeger wel aanders, bin ‘k bange. Die mossen dan een hiele bladziede overschrieven (daegen wark) en dit was mar een tik an ’t oor; nog gien twie tellen deur alle (ong.) vuuftien biebelboeken die roegweg klaorliggen. Et blattien van gister he’k ok mar even verbeterd. Iederiene hoeft et te slotte niet te weten…