Naor Dagboekien

Veurige weke Ankem weke

Weke 44 (25-31/10.2004):
Zundag (31/10):
"Een wieze zeune geft zien vader een protte vreugde,
wat een vremde zeune bezorgt zien moeke vaeks verdriet. "

"Luie hanen maeken aarm, ieverige hanen brengen riekdom."

"Haat geft ruzie, liefde dekt alles toe."

Vandemorgen he’k dus es een schoft wat doende west mit et biebelboek: Spreuken.
Vanmiddag biwwe Drente in west te peerdjerieden. 182 pnt. verdiend, et 9^de winstpunt en de twiede pries in de Z1 dressuur. Et was de reize van een ure henne en een ure weeromme dus wel weerd. Onderweg daor henne hewwe in de auto naor ‘De keuperen tuun’ luusterd (13:00 tot 14:00 ure) mit as gaaste Johan Veenstra van Holtpae over zien 19^de boek "De wereld is gek" (en dat is’ie).
Vanaovend moch ik bi’j Odrie in een karkelik praot-uurtien opdraeven mit mien verleuren zeune en een stokkien uut Hooglied (zie hieronder bi’j zaoterdag). Verschil moet d’r wezen.

Zaoterdag (30/10):
Gisteraovend hiel lekker uut eten west bi’j et Balkan resteraant in Oosterwoolde. Kan ’k je anbevelen.

Vandaege de hiele dag weer drok in de weer mit et ‘Biebelvertoalkerwaai’ zoas de Grunningers dat zeggen.

Morgenaovend he’k tussen zesse en zeuven een praotien over et biebelvertaelen bi’j radio Odrie. Speciaol daorveur he’k even stokkien uut et Hooglied viere vertaeld as vergeliekingsmateriaol. Een stok uut de Statevertaeling, de NBG-51, de ni’je NBV en datzelde stok uut de Stellingwarver. Dat laeste gaot zo:

Ie bin zo mooi, maegien van mi'j,
och, ie bin zo mooi!
Je ogen bin as doeven,
dwas deur je sluier henne.
Je haor golft as een kudde geiten
die daelekomt van Gilead zien bargen.

Je tanen bin as witte schaopen:
klaor veur de scheerder
kommen ze twie an twie uut et waeter,
d'r mist van heur gien iene.

As een wienrood snoer bin je lippen,
je mond ruurt mien hatte.
As et rood van een zuuite appel
fonkelt je lach mi’j toe,
deur je sluier henne.

Je hals is as de toren van David,
die in ringen bouwd is,
die mit schilden behongen is,
mit wel duzend schilden van helden.

Je bosten bin as kalfies,
as de twieling van een gezelle,
die tussen de lelies weidet.

As de dag weer aosemt
zo gauw et morgenlochten is,
gao ik naor de mirrebarge,
naor de wierookheuvel wil ik gaon.

Och mien maegien, an jow is alles mooi,
ik viene niks dat je misstaot.

Vri’jdag (29/10):
Vandemorgen bi’j et laeste soezen op bedde kwam d’r opiens een plot veur een elektronische thriller bovendrieven: Een jongkerel gaot mit zien maegien mit naor et ziekenhuus omreden zi’j een MRI-scan maeken laoten moet. Doe ze goed en wel in ‘et ding’ verdwenen was vul de stroom uut. Even laeter bleek dat et maegien verkeerd kontrastwaeter toediend kregen har waordeur et maegien in coma raekt was. De eerste peer daegen wodt veur iederiene een liedensweg en nao een weke is d’r nog de hieltied gien goeie oplossing vunnen. De dokters kun gien oplossing bedaenken en besluten om et maegien dan mar liggen te laoten in et apperaot, de ofdeling te sluten en de jongkerel mag heur verzorgen blieven zolange as hi’j wil. D’r wodt een komputerlijntien anlegd zodat de dokters zo now en dan nog es kontakt hebben kunnen en zels de MRI-scanner een rontien maeken laoten kunnen om te kieken hoe et mit et maegien staot. De jongkerel bliekt een whizzkid op komputergebied te wezen en kriegt et nao een week of wat klaor om een pergramma te maeken waormit hi’j de dokters een aander plaetien zien laoten kan as de warkelikhied. Ondertussen onderzuukt hi’j et maegien mit de MRI en ziet kaans om heur gedachten te lezen mit die mesiene. Nao een peer maond kan hi’j op een leeg nivo alderdeegst mit heur hassens kommuniseren. Hi’j laot de dokters de hieltied plaeties zien waor gien verbetering mar ok gien verslechtering op te zien is en hi’jzels slaot an ’t expirementeren mit de hassens van et maegien. Dat gaot zoveer dat hi’j ‘alles’ mit heur doen kan en heur ok van alles doen laoten kan…

Vandaege de hiele dag naor Arnhem west.

Donderdag (28/10):
Hej’m ’t heurd…? Gisteraovend maekte oonze Keuninginnne een geweldige blunder. Nao dat ze de eerste NBV-Biebel ankregen hadde van et NBG las ze d’r ok een stokkien uut veur, de eerste tien vassen van Genesis. Ze zee bi’j vas twieje zonder te blikken of te blozen: "De aarde was nog woest en doods, en duisternis lag over de overvloed, maar Gods geest zweefde over het water." Dat had "… oervloed …" wezen moeten vanzels mar ja, aj’ elke dag in overvloed leven dan hej’ allicht gien idenen over et bestaon van een oervloed.

Vroeg in de aovend was de site van et NBG nog een betien in de war mit de oftelklokke die al meer as een halfjaor an ’t oftellen was. Nao 00:00:00 begon et ding negatief te tellen en een schoft laeter (-1:80:00) gaf hi’j de geest. Een schoft laeter op ‘e aovend hebben ze klokke d’r mar ofhaeld en hebben ok drekt alle aandere boeken ‘on-line’ zet http://www.denieuwebijbelvertaling.nl/. Hoezo trouwes, gien poëzie in de Ni’je Biebel... De naacht uut he’k et boek Hooglied zitten te lezen:

Laat hij mij kussen,
laat zijn mond mij kussen!
Jouw liefde is zoeter dan wijn,
zoet is de geur van je huid,
je naam is een kostbaar parfum.
Daarom houden de meisjes van jou.
Neem mij met je mee. Laten we rennen!

Dat is toch prachtig…?

Woensdag (27/10):
Op of rond de eerste augustus is de webstee van de stichting Stellingwerfs-Eigen.nl ‘in de locht’ gaon. Vandemorgen kreeg ik een aemel dat d’r vandaege-of-morgen de duzendste bezuker verwaacht wodt. Een hiel aorige prestaosie, liekt mi’j. Daor kuj’ toch een betien de belangstelling an ofmeten en ok een aorige service van oonze verzorger (provider) om oons even op de hoogte te stellen.

Een goeie weke leden is de ‘Naardense Bijbel’ uutkommen, vandaege komt de ‘Nieuwe Bijbelvertaling’ (NBV) van et Nederlands Bijbelgenootschap (NBG) uut en over een jaor of wat…

Et karkelik uurtien van radio Odrie belde gisteraovend om ankem zundag in heur uutzending een posien te praoten over oonze vodderings van de Stellingwarver Biebel. Ankem zundag van 18:00 tot 19:00 dus op Odrie te heuren. A’k de kaans kriege dan wi’k drekt ‘de toon wel even zetten’ mit de opmarking dawwe an now toe nog niks heurd hebben van de karken in de Stellingwarven. Al een peer keer he’k docht dat d’r wel een karkebestuur bellen zol mit de vraoge as ze ok argens es een zaoterdag mit helpen kunnen of zo mar nee, nul, nada, noppes. Dat ja, waor doej’ et dan eins veur as de karken niet al te vule interesse hebben en oons taelinstituut hoeft niet zo neudig. Och, misschien komt et nog wel es goed mit al die instituten.

Deensdag (26/10):
We kregen vandaege de eerste folder van dit jaor in de busse die begon mit: "Oh, kom er eens kijken…" Die is dan ok drekt in et ronde archief opruumd! Belhaemels.

Et gaot d’r hier op oonze Grindweg bi’jtieden allemachtig meraokels an toe. De baarms en verschillende opritten wodden an stront reden en et glas (van spiegels) ligt al bi’j oons op ‘e dam. Sund et weekaende is de Boverweg (de ‘grote weg’ van Wolvege naor Oosterwoolde) mar mit muuite te bruken en wodt et verkeer ommeleid naor de Schoterlandse weg (Donkerbroek – Et Vene) mar dat is veur de meersten vusen te veer omme vanzels. Ok hiele grote vrachtauto’s (vaeks mit anhanger) donderen mit gemak mit zoe’n tachtig in ’t ure over disse (eins een B) weg. Et waachten is now op de ‘grote klap’. Van et veurjaor doe he’k bi’j de ankondiging van dit projekt deur de meensken van Riekswaeter- en verkeerstaot al een inzunnen stokkien in de NOS zet mit de vraoge as dit wel goed komt. Vandaege of morgen zullen ze hier ok mit et riool in de weer. Vaalt d’r ok nog es wat te lachen hiere…

Ik bin al een schoffien (‘kritisch op verzoek’) an et aemelen mit een ‘oolde rotte’ uut et schrieverswereltien. Hi’j schrieft (neffens himzels) nogal ‘post-medern’ (wat dat - in zien of mien ogen - ok wezen mag). Dit stokkien van mi’j (snip uut die al maonden gaonde diskussie) geft aorig weer, waorin ik mien ‘stijl’ perbeer te vienen en wa’k tegen zien ‘post-medern’ hebbe:
… As dat 'post-medern' staot veur onleesber (of onbruukber) veur ontspanning (ende vermaeck) van een deur de baank neumen burgermannegien zoas ikke, dan wil ik 'never-niet-nooit-niet' 'post-medern' schrieven. Niet allienig in dit soorte schriefwark mar ok in allerhaande aandere schrieveri'je kies ik d'r (zovule as meugelik) veur om te schrieven veur et genoegen van de lezer (!?!) en een betien veur mien eigen genoegen. Juust niet vanuut mi'jzelf een miening of een gedachte op te dringen (soms - wat stiekelig - ok wel es, vanzels!) of vanwege et 'feit' dat ik zo mooi of goed schrieven kan. Dit vien ik ok weeromme in mien vertaelwark: soms stao ik mit ién bien op 'e kaansel, soms zit ik as 'vader' an de eterstaofel veur te lezen (of bin ik et kiend dat veurlezen wodt), dan weer bin 'k een toevallige luusterer die op kastaovend 'bi'j toeval' in de karke verzeild raekt is. Dit betekent veur mi'j da'k de dingen soms luud en dudelik (naodrokkelik) preken wil (kaansel), soms (veur) lezen laoten mit de meugelikhied tot toelichting (vader / kiend an eterstaofel) en bi’jtieden ok wel es wat simplifisere omreden de toevallige passaant aanders wellicht gien weet het waor et 'over gaot'. Meerstal schrief ik as luusterer of (dus) as lezer (perbeer ik te meenste). Bi'j jow - as post-mederne schriever - vuul ik mi'j de hieltied zo 'klein' in de zin van: waorom begriep ik now niet gewoon in ién keer wat d'r staot? Waorom stroffel ik de hieltied over je woorden bi’j et lezen? Dat geft mi’j (as lezer) gien lekker gevuul want ik wil niet de hieltied as 'klein' zien wodden! Ik bin ik… en ik wil jow boek(en) lezen omreden ik mi’j daor ‘lekker’ bi’j vulen wil. En as ie zo neudig ‘post-medern’ schrieven willen / moeten, dan moej’ dat vanzels hielendal zels weten mar ik zal je boek(en) niet antugen. En wat was et doel van je schrieveri’je ok alweer???