Naor Dagboekien

Veurige weke Ankem weke

Weke 40 (27/9-3/10.2004):
Zundag (3/10):
Meerstal op zundag lees ik hier en daor es wat in i-dagboekies van ‘kollega-i-dagboekien-schrievers’. Die van Joop Boomsma (Frysk) daor he’k mi’j vandaege veur de laeste keer over opwunnen. Daor kom ik niet weer. Allienig al dat ingewikkelde gedoe van ‘Volgende, veurige, eerste en laeste bladziede’ dat warkt bi’j him meerstal niet of ik begriep d’r hielendal niks van, dat zol ok nog kunnen. De inhoold van zien i-boekien boeit mi’j ok hielemaole niet. Mar goed, disse man zal oons bi’jkotten bi’jbrengen hoe et heurd, he’k begrepen van de Schrieversronte. Vraog ik ‘m dan ok wel even hoe dat zit bi’j him mit veuruut en aachteruut. Ik hope dat hi’j d’r in zien auto(gien) wat minder muuite mit het. Of zol et een treinreiziger wezen?

’t Gong gister op de drafbaene (weer) boven verwaachtings goed. Drie keer (!) een trio van een peer honderd euro goed en nog wat ‘kleiner’ spul. D’r bin daegen da’k minder verdiene. Laeter biwwe naor Et Klaoverblad in Appelsche west te ‘midgetgolfen’. Rond middernaacht hewwwe de daansvloer in ‘Live in Appelsche’ nog even onveilig maekt en we hebben vannaacht bi’j ‘De Zon’ in Oosterwoolde slaopen. Van negen tot tiene ston daor een Stellingwarfs ‘ontbijt’ (morgenbroggien) klaor en now zit ik (gelokkig) weer op mien eigen stoel. Dit soorte van drokke daegen (al vaeker vandeweke) kun haost niet meer aj’ boven de dattig kommen.

De kraante (LC) van zaoterdag:
Blz. 1: "De vele tientallen damherten die in het wild in Friesland voorkomen, moeten worden gedood, zo meent de provincie. De dieren horen niet thuis in Friesland."
Now, dan weet ik nog wel een diersoorte (vaeks mit een strik omme hals) die hier niet thuusheurd. Ok mar ofschieten…? Ik wil ankem weke even naor et Gemientehuus veur een jachtakte…
Blz. 2: "Dapper duo bezocht zo’n beetje alle banken."
Dat et van heurzels al wat stinkt in de Rotterdamse haven dat wussen we wel mar dat et daor zo allemachtig stinkt dawwe et hier in Frieslaand roeken kunnen. Dat hoeft toch zo mal niet?
Blz. 3: "Alle agenten verplicht in een kogelvrij vest."
Now en dan wodt d’r daolik vanzels (nog) vaeker een ‘gewone man’ ommelegd en nog even laeter zullen ze dan wel zeggen: Haj’ gien koegelvri’j vest an? Eigen schuld, dikke bult.

Vraogtekens bi’j Italiaanse eurokommissaris, vraogtekens bi’j vrouw Kroes, vraogtekens, vraogtekens en nog es vraogtekens. Now ik hebbe daor hielendal gien vraogtekens bi’j. Et is mi’j onderhaand wel dudelik.

In Kenia bin een stok of tien gevangenen uutbreuken uut heur cel deur hiel luud psalms te zingen en hiel-hadde-op te bidden. Welke Stellingwarver zee ok weer dat et biebelvertaelen gien nut had? We moe’n hier allienig nog even een eigen gevangenis bouwen. Dat wel vanzels.

Mien favoriete kollumniste (Jantien de Boer) ston ok weer netties naost de inzunnen stokkies. Ze het even een bemoedigende haand tegen de bast van de Wilhelmina-liendeboom legd. Dat dee me goed en Geert Dales kan om mi’j wel oppakken.

Dislekt a’k bin. Ik doch warkelik even dat d’r "Stopverbod veur boten" ston mar et bleek een ‘sopverbod’ te wezen. Now meugen ze om mi’j alle plezierboten wel uut de vaort nemen mar zoe’n verbod om je botien schone te maeken mit sop dat minder schae dot as oonze ‘vaatwasser’, dat gaot mi’j toch te veer. Weer een hiele bedriefstakke die omziepe hulpe wodden zal.

Doe een glimmende Kommissaoris Nijpels en een nog slimmer glimmende Borgemeister Lesterhuis vri’jdag drok doende weren om et ni’je Gemientehuus (now ja, ni’je… ze bin al weer an et tekenen mit de volgende bin ‘k bange) van Oostaende eupen te breken kwam de vrouwelike postbode vrolik fluitend en al slingerend tussen et gezelschop deurfietsen onderweg naor ‘heur’ brievebusse. Ze wodde vot-en-daolik votstuurd: vandaege mar even gien gedonder mit brievespul en gien tied veur een vrolik fluitend maegien op een rood fietsien. "Hé, kleine meid op je kinderfiets…(HvV)"

Zol d’r veur et prieeltien in de Netaoristuun in Jorwert wel een bouwvergunning ofgeven wezen? En zol wel onderzocht wezen as d’r warkelik gien biezonder moesien huushoolt in de grond d’r onder?

In Achtkarspelen bin tien van de zestien stemlekaolen in gebouwgies van de karke. Dat kan vanzels niet. We hebben jaoren leden al mitmekeer ofpraot om een dudelik onderscheid te maeken en te holen tussen staot en religie. Straks komt et nog zo dat ze daor de karkedienst in et Gemientehuus holen omreden de karken as stemlekaolen inricht binnen en dan moe’n de baentiesmannen in de karke huusholen omreden et karkevolk in et Gemientehuus zingt en bidt en dot.

Et Klunderen (van Johan V) he’k ok nog es onder et vergrootglas legd. Iene windmeulen, twie wiendmeulen(s). Tikfout? kan gebeuren. Et verbaand tussen Domtorens en wiendmeulens zie ik niet zo en zal allienig op de hoogte slaon, liekt mi’j. "… ienig benul …" vien’k wat een (te) letterlike "… enig idee …" vertaeling. "… een klap van de meule had." Komt mi’j wat vremd veur. Een klap van een meulewiek(e) had hebben, liekt mi’j. Mien ‘spreekwoordenboek’ zegt: Hij heeft een klap van de molen beet = hij is niet goed bij zijn verstand. Letterlijk: 't is of hij door een slag van de molenwiek zijn verstand heeft verloren. Hé, nog een keer ‘wiendmeulen’ in stee van ‘wiendmeulens’! Dan zoj’ toch haost zeggen dat et gien tikfout meer is. "… beginnen te doen mit heur meulen …"??? Now begriep ik et even niet meer. Gaot dit stokkien now over iene meulen of gaot et over een ‘een flut wiendmeulen(s)’; over et inkelvoold of meervoold van wiendmeule(n)??? Et Stellingwarfs Woordeboek d’r bi’j, want ik wor gek! Van liekewel blz. 856/857 S-Z (wiendmeule) as blz. 279/280 (meule) wo’k niet vule wiezer. Et schient zo te wezen: iene meule en twie meulen, schient verspreid veur te kommen. Iene meule(n) en twie meulens schient veur te kommen in Spange en Donkerbroek. Laot ik now krek een Donkerbroekemer / Donkerbroekster van komof wezen. Dat Johan het gewoon geliek (hi’j het gien ongeliek zol een baentiesman zeggen) en ik, ik wil eins nooit meer wat mit (wiend)meulen(s) van doen hebben. Dommiet gao ‘k nog mit meulenties lopen… "Jim hebben dan mitien veurdielig …" of geef mi’j mar: "Jim hebben dan drekt veurdielig…". ‘Iedelhied’ vien ik gien mooi woord. ‘Et wat hoge in ‘e kop’ hebben of zo vien ‘k mooier. Mar now wo’k wel wat miereneukerig. In et Biebelboek Prediker mos et ‘ijdelheid der ijdelheden’ ok al ruumte maeken veur: et is allemaole locht en leegte. Dat et ofbreekpergramme van de LC niet zo goed overweg kan mit et Stellingwarfs is al vaeker dudelik wodden. Ze hebben ok altied al wat muuite mit de Fryske ‘staveringshifker’ en alderdeegst heur Nederlaanse spellingskonterleur lat heur nog al es in de steek.

Ik geleuf, ik gao mar even een ure liggen…

Zaoterdag (2/10):
Eregisteraovend laete – zeg mar hiel laete – belde mien breur a’k morgen (vri’jdag) ok mit wol, een dag op stap. Ik mos om halfnegen henne klaorstaon op Eelde en ik mos mien golftasse mitnemen. Dat om klokslag halfnegen (gistermorgen) kwammen mien beide breurs in een Cessna uut de locht valen. Een goed halfure laeter zatten we weer tegen de wolken an (zoe’n driehond meter hoge) en bin mit oons driejen (we bin nog mit drie van de zes breurs) naor Schotlaand vleugen. Onderwegens het hi’j et vlochtplan nog een betien bi’jsteld en een landingsbaene zocht die niet al te veer van een golfbaene of lag. Neffens mi’j biwwe argens laanded bi’j een plakkien dat ‘Essefuddz’ of zoks hiet. Van et vliegveld naor de golfbaene was mar een tik an ’t oor mit een taxi. Nao een peer paantiens koffie en een ‘lichte lunch’ biwwe de baene op gaon en hewwe gezellig mit oons driejen de achttien holes lopen. Prachtige baene. We weren aorig an mekeer waogd mar ik hebbe nog krek van de beide mannen wunnen mit mien twintig Stableford-punten (allemaole Hcp. 36 veur ‘insiders’). Gisteraovend laete – zeg mar hiel laete – hebben ze me weer op Eelde op de grond valen laoten. Zi’j gongen nog deur naor Schiphol. Goed twaelf ure wa’k thuus en vannaacht he’k slaopen as een osse? Hoe slaopt een Stellingwarver eins as hi’j geweldig goed slapt?

Vandaege moch ik dan ok uutslaopen en vandemiddag zuwwe mit een bedriefsfesien naor de drafbaene in Wolvege te gokken. De laeste keer da’k daor was – een goed halfjaor leden – doe kon ’t wel uut. Doe ha’k nog een ‘pot’ van driehonderdtachtig euro. Mar kieken hoe ’t vandaege komt. Ik wil now eerst even deur de zaoterdagskraante (Klunderen) en dan moe’k morgen mar even goed deur de kraanten want dat is d’r de laeste daegen aorig bi’j in scheuten.

Vri’jdag (1/10):
Kiek mar bi’j zaoterdag want vandaege ha’k et even niet an tied.

Donderdag (30/9):
Disse dag is now (21:50 ure) nog niet iens hielendal veurbi’j mar ’t was an now toe in elk geval een mooie dag, ik mag wel zeggen een uutzonderlik mooie dag. Vandemorgen eerst even naor Et Vene west veur haandel. Da’s niks wodden, zokke klanten zit ik ok niks op te waachten en daor wi’k veerder ok gien woorden smerig an maeken.

Om middag (noen) henne bin ik een peer uren mit de Adderman (Andries) et heideveld hier aachter oons huus (de Deddingabuurt) in west. We hebben vandaege een peer unieke stokken film maekt. En wat wet die man een protte van slangen en adders (of weet ik d’r zo verrekte weinig van!). In een floep en een zocht zatten we d’r midden in. Rond om oons toe adders en ringslangen as steerns bi’j naachte an de locht. Een peer weren him te slim of mar hi’j het toch ok een peer zoemar oppakt. As hi’j d’r mit zien (blote) wat mit an et speulen was moch ik mit zien (semi-professionele) filmkamera veur cineast speulen. ’t Was veur Andries veur et eerst dat hi’j adderties hielendal los bi’j himzels over de haand en aarms lopen leut. Oeps.., kroepen leut. Mennig keer is hi’j waorschouwd om dat niet te doen mar Andries het de miening dat as hi’j niet vechtlustig of alderdeegst mar een betien vervelend tegen de adder dot, dat de adder him dan ok niks doen zal. Vandaege har hi’j gewoon geliek. De adderties kreupen bi’j zien aarms op en of. Et leek wel cirkus en ik was de ienige toeschouwer. As ik mit een grössprietien zoe’n besien een betien anzetten wol, tot (nog) meer aktie dan stakken ze naor mi’j wel de kop uut en begonnen slim mit de spleten tonge te zwieberen. En wa’k d’r al roegweg van zien hebbe bin et ok warkelik mooie plaeties wodden. Andries het wel meer geweldig mooie opnaomes van adders en ringslangen he’k wel es zien. Wat daenk ie van een adder die veur et eerst nao zien winterslaop uut et hollegien komt of een mannegien en een vrouwgien die an ‘t perberen binnen om joonkies te maeken of twie mannegies die an ’t vechten raeken. Prachtig, prachtig, prachtig.

Rond vier ure mossen wi’j beslist op huus an want om een uur of vieve henne mos ik naor RWC in Noorwoolde te Wiespraoten. Joukje en Jan hadden vandaege een snipperdag en Jannes en Britt hadden et plan maekt om mi’j es hielendal (een ure laank) deur te zaegen over et vertaelen van de Biebel in et Stellingwarfs. Waor he’k al es heurd: Iene gek kan meer vraogen as dat een hiel leger an perfesters an antwoorden (bescheiden) geven kan? Mar ’t is goed terechte kommen (geleuf ik).

Drekt bi’j de radio weg, bin ‘k daor bi’j de (bijna buren) Chinees binnenlopen om wat lekkers mit te nemen veur thuus. Ik trof et da’k allienig in de winkel was want doe kowwe d’r even over praoten. Eerder he’k al es verneumen dat die Chinese mevrouw slim graeg over heur vaderlaand en veural ok over heur tael (et Mandarijn) verteld. De (Chinese) woordeboeken kwammen d’r vandaege an te pas. Ze het mi’j (nog es) uutlegd dat zi’j bevobbeld iene letter ‘A’ in vier verschillende klanksoorten kennen mit elk een hiel eigen betekenisse. Wa’k ok mooi vun is dat ze iene boom tekent in heur schrift en as ze d’r dan nog een boom stief tegenan tekent, dat dat dan een bos betekent. As ze d’r ok nog een boom boven tekent dan is et een diep / groot bos. Fang Youn, de naeme van heur winkel staot veur: vierkaant en rond. Dat staot dan weer veur ‘alles omvattend’. Filesefie in twie letters. Jaoren leden he’k al es een kursus Russisch daon mar zok Chinees dat liekt mi’j ok nog wel es mooi toe om mi’j wat meer in te verdiepen.

Misschien wel een aorig idee veur mien kollega’s van RWC Huus en Hiem om disse (of een aandere) Chinese mevrouw es in heur pergramme uut te neudigen om over heur tael en de duzenden dialekten van heur tael te praoten in verholing tot et Nederlaans, Fries en Stellingwarfs (want daor wet ze ok best een hieleboel over). Mar ok hoe et toch komt dat d’r in Nederlaand zoe’n protte Chinezen wonen en warken en zo. Daor za’k es even mit Henk en Frank over aemelen.

Woensdag (29/9):
Wat za’k vandaege es anpakken. Vandemorgen mar even kalman wat koffiedrinken, rond de middag (noen) vesite uut Hollaand, in ’t twielochten he’k bi’j Waanders in Staphorst ofpraot en taovend moe’k in Wezep (krek onder Zwolle) wezen. Dan het et ok wel weer mooi west veur vandaege, donkt mi’j.

D’r kwam vandaege ok een aemel binnen mit ‘n vraoge as dat hotellegien mit die grote voegel in Wolvege al haost klaor was omreden ze twie daegen uut Braobaant hier kommen wollen. Nee, mar ik zegge d’r is hier krekleden wel een keuninklike ‘bedde en broggien’ eupend, he’k van heurd. Of ze daor aovends dan eerst wel een blikkien bier van de Lidl kriegen konnen en wat laeter op ‘e aovend wel een schone borrel of een glas donkerrooie wien drinken konnen? Morgens as ‘onbijt’ wollen ze graeg roggebrood mit spek en bakte eier mit een paantien thee. Weten doe ‘k et niet mar et liekt mi’j gien perbleem, he’k heur mar weten laoten.

Krieg ik now weer een aemel of et ok meugelik is dat de beddebeweerder van die bolle-mit-een-broggien heur ok in zien uniform uut de kleren helpen kan want ze bin niet meer zo botte smuui in de bienen. Et jassien van de beddebeweerder moet een dubbele riegel goolden knopen en een protte onderscheidingstekens hebben. Daoronder een haegelwit boezeroen mit stieselboorties en een roze vlinderstrikkien. Veerder een witte drollevanger die lekker woeps om een strak kontien zitten moet, roze driekwat kousen mit een kwaste an elke kaante en zwatglimmende lakschoegies moeten et gehiel mooi ofmaeken. As dat daor bi’j jim allemaole te koop is veur twie naachten, dan kommen wi’j d’r an!!!

Ik heb ze krek et webstee- en aemel-adres van die keuninklike beddebeweerder zels mar deurgeven want dit wodt mi’j now slim genoeg. Wat daenken die meensken wel niet van mi’j…

Deensdag (28/0):
’t Was alweer een hiel schoft leden da’k meer as vuuf ni’je (Stellingwarver) woorden op iene bladziede vun in et dagboekien van de bekendste Stellingwarver schriever. Mar vandaege ha’k wel achte in ien keer (waorveur daank), dat ik hebbe mi’jzels trakteerd op een maelkoekien bi’j de thee.

"Daelehangen" (blz. 605 A-E: "neerwaarts hangen"), daor mos ik vanzels wel even langer over naodaenken. "Ik heb et daor even daelelegd" of "ik heb et daor even ophongen", liekt mi’j goed toe mar: een schilderi’je daelehangen…? Neffens Bloemhoff (en Veenstra bliekber ok) schient et zo wel te kunnen en toch he’k een argement waor as Bloemhoff nog mar es over naodaenken moet. Et zol mi’j gien ni’j doen as dat ‘daelehangen’ niet hielendal goed terechte kommen is in et Stellingwarfs Woordeboek.
Et Boek geft drie veurbeeldzinnegies: 1. Waor hej’ je jasse daelehongen (Nbk); 2. Ongeveer een meter veur de hekke wodde dan een paol neerhongen zodat et vee niet op ‘e damme kommen kon; in een stuk laand waor pinken lopen gebeurt et nog wel, mar dan wodt d’r meestal schrikdraod veur bruukt (Spa); 3. Et blad was bevreuren, et hong hielemaole daele (Nbk). Bi’j de nommers iene en drieje zien we dat et in Ni’jberkoop (Nbk) opdeuken is. Stel, dat dat deur een ‘spraakgebrek’ (letterlik en niet onaorig bedoeld) bi’j de Bloemhoffies thuus zels zo (wel es) bruukt wodde. In dat geval bin de beide zinnegies niet slim weerdevol veur de waorhied, liekt mi’j.
In et twiede veurbeeldzinnegien uut Spange (Spa) staon naost et ‘neerhongen’ nog een peer twiefelgevallen, liek as: ‘damme’ (et woordeboek geft zels de veurkeur veur ‘dam’ (blz. 618 A-E), een ‘stuk’ laand; wi’j zeggen: een ‘stok’ laand (blz. 401 S-Z) en veur ‘meestal’ (blz. 238 L-R) zeggen / schrieven wi’j: ‘meerstal’. Ok in dit geval hecht ik daor niet al te vule weerde an om et ‘daelehangen’ stark te onderbouwen.
Daelehangen in een goeie betekenis ken ik wel van bevobbeld roeselties, gedienen en et grote (rooie) veurhang (staot niet in de Dikke, liekemin as ‘veurhangsel’) in et theater. Die koj’ optrekken (‘haal het doek maar op’) of ie konnen ze daelehangen (‘tot halverwege of lager laten zakken’).
Mar dat het allemaole niks te maeken mit et daelehangen van een schilderi’jgien…! Dit had neffens mi’j gewoon "Ophangen (blz. 682 L-R) 1. aan een hoger gelegen punt doen hangen" wezen moeten.

"Krulderige"; wat is dat now toch veur een mal woord? Neffens ‘oons Boek’ (blz. 807 F-K) had dit eins "Krullerig" wezen moeten. Die laeste he’k in mien woordeliesten opneumen mit et Nederlaanse: "krullenrijke".

"Ontbijtspek"; ik geleuf et grif, dawwe in Stellingwarf al jaor en dag wat mit spek hebben, mar hoe zit et mit dat "ontbijt": ontbijtkoeke, ontbijtshow, ontbijttillevisie en ontbijtzael bin alle woorden die mit ‘ontbijt’ beginnen op blz. 630 L-R. Om mi’j had d’r gieniene van dissen in hoefd. Een Stellingwarver die et veur zien ‘ontbijt’ gien ‘ontbijtkoeke’ in een ‘ontbijtzael’ en kikt daor al hielendal gien ‘ontbijtshow’ bi’j op ‘e ‘ontbijttillevisie’. Ja, import-Stellingwarvers misschien… Gelokkig komt dit ‘ontbijt’ in mien woordeliesten hielendal niet veur. Ik zol die boekies dan ok grif uut de haandel neumen hebben. Een Stellingwarver eet gewoon een morgenbroggien en drinkt daor dan een paantien thee bi’j of zoks.

"Uutvanhuzerskaemer" he’k in mien woordeliesten opneumen en vanzels gewoon vertaeld mit: uitvanhuiskamer. Wi’j vertelden op schoele altied al tegen de meester of de juffer dawwe een peer daegen ‘uitvanhuis geweest weren’.

"Toemaekt"; blz. 474 S-Z het een hiele protte veurbeelden mit dit ‘toemaeken’; wel een stok of vuuftien en die gaon (terechte) allemaole over et toemaeken van eteri’je. Opiens floept d’r - krek over de helte - ok een veurbeeld tussendeur over et ‘toemaken van specie’. Gelokkig, daor staot daor dan ok drekt (Nbk) aachter en komt mien hatte weer wat op gaank.

"Klaormaekt"; ha’k die nog niet? Nee bliekber niet want mien komputer-woorde-importeur stroffelde d’r over. Dit is now typisch (waorom eins gien: tiepies?) zoe’n woord dat ok vaeke in twiejen knipt wodt: "klaor maekt". Dit verschiensel (saemenstellings van woorden) he’k Henk al es veurlegd: Dit verschiensel kom ik hiel vaeke tegen in de Stellingwarver schrieveri'je. Ok mit mien biebelvertaeling. Saemenstellings die eins as ién woord schreven wodden moeten (in 't Nederlaans) mar die in 't Stellingwarfs hiel vaeke los van mekeer bruukt wodden. Hi’j gaf doe as bescheid: Ja, een boel kun an mekeer, mar ze hoeven dat niet de hieltied, zo is et naor de gewoonte; een schriever kan dus vaeke neffens zien persoonlike veurkeur schrieven. Op blz. 632 F-K wodt et ‘klaormaeken’ bried uutstokt: 1. Gereedmaken; 2. Koken, bereiden. Nommer drie mis ik hier… en da’s now krek waor as ik et eerste an docht dat et wezen mos. Op diezelde bladziede wodt et gelokkig goedmaekt (goed maekt) bi’j et lemma: ‘klaorkommen’. Kiek zels mar es hoej’ op vuuf verschillende menieren ‘klaorkommen’ kunnen.

"Brummelsjem"; mooi woord veur ‘bramenjam’.

Gisteraovend hewwe weer een geerkomst had van de warkgroep ‘Stellingwarver Biebel’ en hewwe onder et genot van een glas rooie wien en een gehakballegien een peer stokken van et boek Lucas nog es even opni’j bekeken. De hieltied aj’ d’r weer naor kieken vaalt d’r vaeks ok nog wel weer wat an te beteren. Dat doe’we dan ok. Et doel is dat Lucas (o.e. mit et geboorteverhael van Jezus) in begin december as proefdrok uutkommen zal.

In de ‘Dikke Bloemhoff’ wodt et woord ‘Baentiesman’ (blz. 236 A-E) kotweg uutstokt as ‘Ambtenaar’. Now he’k ok wel es heurd dat dat soorte volk in een ‘netuurlike habitat’ zoas bi’j de Ned. Grondmij en Staotsbos, ok wel es ‘Reiger’ nuumd wodt. Bi’j reigers staot (blz. 1029 L-R): (1) bep. Vogel en (2) iemand met lange benen (hoe numen ze iene mit lange ti’jen eins?). De overienkomst tussen een Baentiesman en zoe’n Reiger zal wel wezen omreden ze beide een hiel schoft ‘stille staon’ kunnen. Ik zee: kunnen! Een viskerman die (te) lange op ien plak stille staot (stille staon doej’ meerstal op ien plak) numen ze wel es een ‘Blauwe Jaap’. En dat staot now krek weer niet in de ‘Dikke’. Blauwbroek veur Veldwachter gelokkig wel (blz. 426 A-E).

Van de Wiespraoters bin d’r ankem donderdag een peer die een snipperdag neumen hebben. De leden van et forum die over bleven binnen hebben et ‘snode plan’ bedocht om mi’j in dat ure es hielendal deur te zaegen over et vertaelen van de Biebel in et Stellingwarfs. Ik zegge: dat kan wel mar dan vraog ik Frank d’r ok even bi’j. Laot die now krek die aovend beslist niet kunnen (dat zee hi’j temeenste). Stao ’k d’r hielendal allienig veur. Now ja, mar kieken hoe ’t komt…

Maendag (27/9):
Dit weekaende aorig wat aemelties had over mien kommentaor op et Karstiaans geklunder. Dat gong van: Iens; et mos verbeuden wodden, tot: Ie moe’n die jonge niet zo plaogen. Now, et het vanzels niks mit plaogen of zo van doen. Ik vien wat ik vien en dat roep ik niet zo mar wat, nee ik drege d’r dudelike argementen bi’j an. En geleuf mi’j, et is inkeld bedoeld om de schrieveri’je een betien netties te holen. As iene daor – bliekber willens en wetens – niks mit doen wil dan is dat zien goed recht mar as zien stokkien over veertien daegen weer krek lieke ongeef Stellingwarfs is, dan komt mien ‘inzunnen’ d’r grif vlot aachteran en za’k mien best doen om dat geklunder in de LC opholen te laoten. Wie was dat ok weer die zoe’n half jaor leden tegen mi’j zee of argens schreef: liever gien Stellingwarver Biebel as halfbakken wark…?

Et weekaende – naost de gewone plichten vanzels – ok weer drok in de weer west mit de Haandelings van de Apostels. Een dreeg stok mar we gaon kalmpies an mar wat deur. In de LC ston vandaege een stokkien over et Biebelvertaelen (NVB) mit de kop "Nieuwe Bijbelvertaling behandelt lezer als infantiel." Neffens mien woordeboek is dat ‘infantiel’ zoks as: kinderlik, overbleven uut et kiendstadium, in ontwikkeling aachterlik. Da’s niet niks…! Now wi’k best leuven dat d’r veur (en deur) specialisten (theologen) hier en daor vaaste wel wat op te marken is mar wat willen ze now eins: een Biebel die allienig deur (een peer) specialisten te lezen en dus uut te dregen is (machtswellustelingen?) of een leesboek dat liekewel op de kaansel as op de eterstaofel bruukt wodden kan. Et waore, wel of niet geleuven, zal ‘m toch – liekt mi’j – niet in de schriefwieze van een peer uutzochte woorties zitten? Zo-wie-zo hewwe et over een bronkode van een peer duzend jaor leden. Et gevuul dat daor bi’j heurt, hoe dat vuult, in die tied en op een peer duzend kilemeter van Stellingwarf, daor hebben wi’j toch gien weet van! Et lieken wel kammeraoden van oold-heufdmitwarker Pieter J.: lao’we de latte zo hoge leggen zo dat d’r meer meensken ofhaoken as mitdoen.