Now, en wat kuj’ dan mit zokke siefers? Een konklusie is al gauw trokken mar of dat now zin het. Et liekt mi’j toe dat de iene vaeks wat langere woorden bruukt as de aander. En deur et ik-gebruuk zoj’ zeggen kunnen dat diegene wat meer over of van him- of heurzels zegt. Ik zal wel een (k)oolde schriever wezen, bin’k bange.

Wo. 28 juli 2004.
Vandemorgen he’k eerste een peer ure gewoon an ’t wark west. Wat laeter op ‘e morgen he’k allerhaande aktiviteiten rondomme de ni’je stichting ‘Stellingwerfs Eigen’ in gaank zet zoas et anvraogen van een baank-rekening en et anvraogen van een webstee en et anvraogen van wat subsidie.

Vandemiddag wo’k eins even naor de Berkoper mark mar doe ‘k daor ankwam bin ‘k ok drekt mar weer votreden. De meerste meensken weren d’r al geleuf ik. Man, man, wat een volk. En daor kan ‘k niet goed tegen, dat klofterige. Dat, ik bin mar weeromme dri’jd en hebbe mi’j een peer ijsco’s mitneumen naor huus.

Ok al even de eerste ‘boekbespreking’ mit oonze drokker had over de volgende uutgaove van een boekien uut de riegel ‘De Stellingwarver Biebel’. ’t Zal wel september wodden bin ‘k bange.

De boompiesrooiers van Oostaende weren ok es weer (over)aktief west, las ik in de kraante (LC). Een hieperaktieve baentiesman die de riegelties belangrieker vient as een goed gesprek mit zien naoste buren. Hiel lange leden weren disse meensken d’r veur de burgers. Krek zo ‘k zegge, hiel lange leden, doe was dat zo.

De. 27 juli 2004.
"As een vrouw is, waor ze niet heurt te wezen dan is een man daor meerstal de reden van", heurde ik gisteraovend argens in een vladde op ‘e tillevisie. Dat zette mi’j an et daenken. Ik hebbe d’r zuver de hiele naacht wat mit ommepakt. En a’k et aandersomme dri’je: As een man is, waor hi’j niet heurt te wezen is een vrommes daor dan meerstal de reden van? De eerste vraoge is neffens mi’j: Wat heurt; waor heurt een man of een vrouw dan eins te wezen? Pattie meensken hebben daor strakke idenen over. Lange leden was dat ok dudelik: de vrouw was veur en de man was aachter (in of bi’j huus), zi’j bi’j ’t aanrecht en de kiender en hi’j aachter op et laand of op ‘e stal. Mar die vlieger gaot tegenwoordig niet meer op. De volgende vraoge is dan: Waor komt een vrommes zoal waor ze niet heurt te wezen? Ik kan bedaenken dat die situaosie allienig mar veurkomt as d’r ok rottighied in ’t spul is. Veerder meugen ze van mi’j overal kommen en een man is neffens mi’j vule vaeker op plakken waor hi’j (eins) niet heurt te wezen.

D’r kwam vandemiddag ok nog even een gezellige bouwvakker over de heerd. Bouwvakkers kun d’r vaeks ok zo mooi bi’jkommen. Doe hi’j d’r inkwam legde ik de kraante (LC) eupenteerd weg en de man zien oge vul op wat een vremd koppien boven een artiekel in die kraante: "Zelfkazers molken teveel." Inderdaod misschien wel wat een vremd zinnegien mar kraantekoppies hebben wel vaeker wat vremds over heur. Mar wat bin ‘zelfkazers’ vreug de man, bin dat mannen die niet trouwd binnen? Ik perbeerde uut te leggen dat daor in dit geval ‘zelfkazende boeren’ mit bedoeld wodden. En wat ‘molken’ die dan? Zee de man weer. ‘Molken’ perbeerde ik, is de verleden tied van ‘melken’. Eins had d’r ‘hebben teveel gemolken’ in de voltooid verleden tied staon moeten, vulde ik nog an want et berichien gong over melkeri’je in et jaor twieduzend. Ja, mar verleden tied is toch altied al voltooid, gong de man deur... Hoe leg ie dat now toch allemaole uut, docht ik nog even. ‘k Hebbe een aandere oplossing vunnen krek as ‘sterretje’ in de LC en ik vreug: woj’ een pilsien van me hebben? We hebben et mar niet meer over de onvoltooide verleden tied, de toekommende tied en al die aandere (on)meugelike tieden had. Veur oons beide misschien ok mar beter zo. Soms moej’ de dingen gewoon laoten veur wat ze binnen.

Om vier he’k naor de netaoris in Berkoop west en hewwe mit oons beidend onder et genot van een kop koffie en deur et zetten van wat handtekenings de stichting ‘Stellingwerfs Eigen’ officieel opricht.

Ma. 26 juli 2004.
In et blad ‘Draf & Rensport’ kwam ik een citaot tegen van een pikeur - van 21 jaor - uut Wolvege die een mooie spiegel kregen hadde van zien pake en beppe veur zien dattigste overwinning. "Daar stond het getal 30 op en ook iets in het Weststellingwerfs. Ik zal het opa eens vragen wat er nu eigenlijk staat." Toch jammer eins, wollen die grootoolden et zo goed doen en dan begript zoe’n snotbongel d’r niks van. Een dudelik veurbield van de oftaekeling van et Stellingwarfs, liekt mi’j. Of zol et een generaosiekleuve wezen. Beide misschien?

'Aarmoede in opkomst' schreef ik al es in een gedicht. De veurste bladziede van de kraante (LC) van vandaege paste daor wel aorig bi'j. Hoe langer hoe meer (et meerst ooldere) meensken raeken hoe langer hoe meer in de aarmoede verzeild. Kwam dat een jaor of wat leden nog wel es omreden die meensken zels wat muuite hadden mit et verpatten van de centen (euro’s), tegenwoordig hebben ze vaeks niks te verpatten en moeten al zovule op (alderdeegst) et eten bezunigen dat ze allienig nog brood mit sjem eten. Zat ik mi'j daor gister in ien keer een halve rollade weg te warken. Daenke now niet dat et hier alle daegen feest is mar dit stok vleis was aorig an de daotum, dat dan kan et es wat meer lieden.

Et plaetien op diezelde veurziede toonde een straote in Dhaka, de heufdstad van Bangladesh. Et is toch niet te geleuven dat zoe'n heufdstad zo blank van 't waeter komt te staon. Kuj' et je veurstellen dat een dadde van Nederlaand incl. de hiele stad Amsterdam finaol onder waeter lopt tot meer as een halve meter. We zollen toch ... ja, wat zollen we dan toch eins? In oonze beide Gemienten hebben ze d'r mit heur ni'je gemientehuzen al wat rekening mit holen donkt mi'j. Zol dat ok een stille veurbode wezen kunnen?