Naor Dagboekien

Veurige weke Ankem weke

Zu. 11 juli 2004.
Vandemorgen wa’k om om een ure of zeuven al weer mit Lucas in de weer. Vandaege he’k 1 Korintiërs ok kregen. Dat veurlopig hewwe weer wark zat. Vandemorgen nog even een koffie(mit)drinker over de heerd had. Veerder eins niks beleefd vandaege. Ok wel es noflik.
Gister uut Zeelaand weeromme kommen. Morgen gao’we naor Duutslaand. Al weer een hiel schoft leden dawwe daor es west hebben.
 

Za. 10. juli 2004.
Vandemorgen hewwe uutgebreid oons morgenbroggien beleefd in een hotellegien op Schouwen-Doevelaand. Nao dawwe weer wat op krachten kommen weren van een roezige naacht, biwwe rond een uur of tiene hiel kalm an en stief langs de kust van de Zeeuwse en Zuud-Hollaanse eilanen weer naor ’t noorden optrokken. In Rockanje / Oost-Voorne hewwe nog even een stief uurtien op et straand ommelopen. Even laeter in de oolde vestingstad Brielle (Den Briel) hewwe uutgebreid de oolde binnerstad deursjouwd. Dit stattien is ontstaon rond 1300. Et is beroemd deur de daotum van 1 april 1572. Op die dag wodde de stad inneumen deur een geuzevloot. Alva verleur daor doe zien brillegien, wodt d’r wel zegd. ‘k Geleuve trouwes nooit dat d’r doe al brillegies bestonnen. De veurlopers van oonze brille, et monocle, lorgnet en lorgnon hadden ze doedestieds nog gieniens weet van liekt mi’j.

An de ‘sky-line’ van de Brielle vaalt de Grote of St. Catherinakarke op. De bouw begon in 1417, mit in de toren een klokkenspul van François Hemony uut 1660. Nao de verdrieving van de Spanjaarden wodde de stad een steunpunt veur de opstaandelingen in de Tachtigjaorige Oorlog. We hebben ok nog even ‘om et hoekien’ keken van de ni’je Maasvlakte. Een hiel uutgestrekt ni’je anweenst veur et havengebied van Rotterdam.

Een mooi begin van een mooi weekaende dat hatstikke vol kulturel uutspatting ston.

 

Vr. 9 juli 2004.
Om een uur of tiene biwwe vandemorgen mit oons beidend votreden naor Schouwen-Doevelaand, een eilandgemeente in de perveensie in Zeelaand. De gemiente wodt begreensd deur de Noordzee in et westen, et Brouwershavense Gat en et Grevelingemeer in et noorden, et Ziepe in ‘t oosten en ‘t Mastgat, Keeten en Oosterschelde in ’t zuden. Omdebi’j 33.000 meensken wonen daor in die gemiente. Et eiland, waorvan de bojem uut klei maekt is, wodt an drie kaanten deur dieken insleuten. An de westkaante ligt tussen Renesse en Westerschouwen een groot stok mit straand, dunen en bos. Tussen Schouwen-Doevelaand en Goeree-Overflakkee liggen de Brouwersdam en de Grevelingendam en naor Noord-Beveland de Zeelaandbrogge en de Oosterscheldedam. Dit en nog vule meer wieshied staot in een foolder de lekaole VVV.

De hiele middag hewwe daor in de omkrieten wat eten en dronken en een slot bekeken. Et (ridder)slot Moermond wodde rond 1229 bouwd deur Costijn van Zieikzee. Een peer bekende naemen van laeter bewoners: Jan van Renesse en Witte van Haamstede. Rondomme op et slot staon botties op zoe’n ien meter zeuventig hoogte van de grond of die angeven hoe hoge et water staon het bi’j de waetersnoodramp in 1953. Waj’ daor in de omkrieten ok een protte tegenkommen bin allerhaande naemen mit ‘…helle…’. Ik daenke dat dat komt van de ‘hellebaord’. Een waopen krek as een lange stok mit an ’t uutaende een peer punten en een soort van een slagersmes, de ‘baord’.

 

Do. 8 juli 2004.
Vandemorgen een protte anloop had. Een protte peerde- en biebelpraot. Tussen de bedrieven deur ok nog even naor Winschoten west. Nao drie ure begonnen mit de veurbereidings van Wiespraoten en om een uur of vieve in de stromende regen naor de studio van RWC. Mit een bakkien troost hewwe hiel gezellig een uurtien zitten te wiespraoten mit mekeer. De meersten van oons vangen hier en daor ok al es wat kommentaor, dat … d’r wodt naor luusterd. We raeken zels ok al wat beter op mekeer inspeuld dat et wodt zo langzem an tied dawwe wat scharper wodden. D’r moet over praot wodden: hi’j’m wel heurd donderdag onder de aovend? Wat konnen ze et scharp zeggen! Baentiesmannen zullen op heur luie stoelen zitten te trillen… Now droom ik wat te veer veuruut… Aandere pergramme’s bin trouwes al mit zommer-reces. Daor doen wi’j niet an. Wi’j gaon gewoon deur.

Ha’k gister op dit plak krek schreven dat Johan now toch wel haost schatriek wezen zol, krieg ik vandaege een fooldertien van de Rabo in de busse mit Johan as grootste belegger bi’j die baank, now ja, dat grootste dat ston d’r niet bi’j. Mar toch… Heb ik altied docht dat dat schrieversvolk op een peer uutzunderings nao, een aarmetierig volkien wezen zol… Een week of wat leden ha’k d’r zels nog een gedichien over maekt. Dat ik zette ok nog mar even deur. Wie wet, komt mien tied ok nog wel es.

Vanaovend he’k ok nog posien in de slag west mit een gedichien over drie maegies. Drie maegies uut de biebel. A’k et gedicht goed genoeg vien dan za’k de drie biebelboeken van die drie meiden nog een keer deurvrotten en dan kan disse trilogie naor de drokker.

(Aj’ me morgen (vri’jdag) missen, dan bin ik veur een kultuur uutstappien naor … Zeelaand. We hebben oppas in huus want we schieten daor mooi een hotellegien in mit oons beidend. Zaoterdag lao’k wel even weten hoe et oons daor vergaon is. Reken d’r trouwes mar niet op da’k jim dan alles an de neuze hange.)

 

Wo. 7 juli 2004.
Vandeweke bin’k wat mit de daegen in de war. Doe et deensdag was miende ik wis te weten dat et nog maendag was en doe et al woensdag was wus ik eins niet meer wat d’r een dag eerder, op deensdag mit me gebeurd was. Ik bin bange dat die grune mannegies mi’j weer een dag mitneumen hebbe. Eerder waorschouwden ze altied even awwe een dag naor de buterwereld gongen. Zollen ze me now zomar mitnemen, zonder heur eerst bekend te maeken?

Now ja, wa’k van gister nog wel wete is dat et Stellingwarver koppel Peter en Johan et ni’je keunstwark van Noordwoolde maeken zal. Fielsetaosies van disse kaante vanzels. Van ’t jaor dus een keunstwark, een ni’je dubbele cd mit oolde stiekelstokkies, een ni’j boek… Johan was al hatstikke schatriek vanzels, al was et alienig mar omreden hi’j schrift, mar now gaot et warkelik in de pepieren lopen bin’k bange. Kiek mar uut, d’r bin mar een peer meensken die de weelde verdregen kunnen, wi’k ‘m nog mitgeven. Ie lopen zomar naost je schoenen. Trouwes bi’j die cd’s mit stiekelstokkies zie ik de hieltied een naeme van een bedrief uut Liwwadden staon en ik miene dat Jan van Et Vene daor al een hiel schoft mit doende was. Zollen ze spul had hebben?

Vandaege nog een hiel dreeg stokkien uut Lucas omme zet. Et ‘Oonze vader’ kwam d’r in veur. Dat bin now krek van die stokken die aorig meer tied vraogen as de meerste platte tekst. ‘k Zal d’r morgen nog es naor kieken. Bi’j mien ommesnuuien in et Stellingwarfs woordeboek, om de mooiste/beste woorden veur Lucas te vienen, kwam ik bi’j toeval: Die het wat van Jan de Knecht pruufd, tegen. Ze is in verwachting, betekend et. ‘k Had d’r nog nooit van heurd mar ‘k vun ‘m wel aorig. Die De Knecht ken ik argens as zanger van veur de oolde draodradio, van et op waacht staon van een soldaot of zo. Mar dat zal wel een Joop west hebben, alhoewel… Jan Soldaot, Joop de Knecht, Joop Soldaot, Jan de Knecht… Za’k nog es over te raode bi’j Henk. Mar Henk het weer niks mit soldaoten. Ik geleuf ik kope nog mar een pottien bier want al disse naemen wodden mi’j te drok in ’t heufd.

 

De. 6 juli 2004.
Gisteraovend las ik in Johan zien dagboekien: En in de dörpen (in Frankriek –pb-) lopen nog gewoon gekken, imbecielen of idioten omme (zo nuumt Voskuil ze). Dat was hier vroeger vanzels ok zo. En doe docht ik, hoezo vroeger. ‘k Geleuf da’k d’r nog wel een mennig (vaeks mit de neuze) anwiezen kan.

Vandemorgen haost de hiele morgen onder de appelboom zitten mit een stel luden die mitdoen willen mit de ni’je Stellingwarver stichting. We bin et d’r over iens dat d’r (vule) meer wezen moet as et uutgeven van dat iene (niet onbelangrieke) boek. Et bestuur is zo goed as in kannen en in kruken, de eerste doneteurs (leden) hebben heur anmelded en de oprichtingsakte hewwe haost klaor.

Vandemiddag hawwe de autotillefoonmonteur (mooi woord veur scrabble) over de heerd. Hi’j het mi’j de hiele santekraom netties in et autogien bouwd. As de tillefoon begint te rattelen dan hoolt de radio him vanzels even stille. Da’s mooi, da’s mooi dat dat zo kan. Et gebeurt mi’j nog al es da’k de tillefoon niet iens heure zo luud he’k de radio dan anstaon. Now za’k dus niet meer schrikken omreden de tillefoon giet mar omdat de radio him stille hoolt.

’t Was d’r gisteraovend even niet van kommen dus mos ik vandaege neudig an de gaank mit de onderwarpen van Wiespraoten veur ankem donderdag op Radio Weststellingwerf Centraal (RWC). Now, ik hoefde de kraante mar te pakken, doe ha’k al genoeg dingen en dinkies waor’k wel een hiele dag over wiespraoten kan, dus dat was vlot klaor.

Veur de rest van de tied he’k mi’j drok maekt over… Ach wat, niks drok maekt. Dat dot een aander mar. Dat bin die meensken die dommiet (of now al) neudig (weer) op vekaansie moeten. Sleurhutte aachter de auto en dan in ien keer dwas deur Frankriek naor die camping waor ze now al veur et dattiende jaor henne gaon. En et is d’r zo mooi want de buren staon daor ok. Ok al weer veur et zeuvende jaor. En now las ik vandaege ok nog dat et hielendal niet zo gezond is en gao op vekaansie. He’k altied al zegd trouwes. Ik bin dan ok altied bliede as ’t weer maendag is. Allienig daoromme al, wodt wel es zegd da’k een betien vremd bin.

 

Ma. 5 juli 2004.
Vandemorgen wa’k al om acht ure al bi’j de gerage in Drachten. D’r mossen nog wat ditties en datties (radio inbouwen en zoks) an de ni’je auto gebeuren. Morgen komt d’r nog iene van de KPN om de tillefoon d’r in te zetten en dan is dat allemaole mar weer klaor. Op de weerommereize even bi’j de bakker in Berkoop an om bolle en wat lekkers bi’j de koffie en doe an de ginnekaante van de straote ok drekt mar even …

Naor de netaoris om wat infermaosie vanwegens de ni’je Stellingwarver Biebelstichting. Now, zoe’n akte opzetten was niet zo muuilik aj’ een stok of wat vaaste gegevens mar klaorliggen hadden zoas: de naemen van de oprichters en van de bestuursleden en zo. Dan even betaelen en bi’j de KvK inschrieven (en daor ok even betaelen bin’k bange) en dan was ‘t klaor. Op mien vraoge of de officiele akte ok in et Stellingwarfs kon kwam een pertinent ‘nee’. Op mien, waorom niet: et Stellingwarfs is gien tael neffens de wetten waor ik mit te maeken hebbe, zee de netaoris. Ik hebbe daor nog tegenin brocht dat op de webstee van de SSr staot dat et Stellingwarfs wel een tael is neffens heur: FAQ (vaeke stelde vraogen) 1. Is het Stellingwerfs een taal of dialect? Antwoord: een taal. Mar daor had de netaoris in dit geval niet al te vule bosschop an. Dat ja, we moe’n mar een Stellingwarver ‘knuppelvri’jdag’ orgeniseren ha’k docht. Tied veur mobelesaosie dus …

Vandemiddag even naor mien zuster in Liwwadden west te theedrinken. Daor zo’k veerder niks over schrieven he’k heur beloofd. Thuus nog wat mit barkodes an et klooien west en laeter es perbeerd om een stichtingsakte (be)schrieven.