Naor Dagboekien

Veurige weke Ankem weke

Zu. 27 juni 2004.
Een peer kraanten hadden mi’j vandeweke al vraogd a’k zels even een verslaggien maeken wol omreden ze zaoterdag deur de TT en al et voetbalgeweld wat krap in de schrievende passe-meensken zatten. Dat verslag he’k krek naor een peer kraanten toe stuurd (ae-meld) en in twie taelen op de mien thuusziede zet. Elk die et verloop van et ‘Startschot’ nog es naolezen wil kan et daor dus vienen.

Krek nog een kot interviewgien daon en een stokkien uut De verleuren zeune veurlezen, veur een ‘heavy’ EO-meziek-pergramme tussen negen en tiene op de zundagaovend. Now het et ok haost mooi west donkt mi’j en gaon we morgen mar weer over naor de odder van alledag.

Vanmiddag nog even mit et laeste stokkien uut et evangelie van Marcus an ’t wark west. Hiel roeg is dat now ok klaor. Ik wil et zels now nog een keer of wat deurlezen en verbeteren veurda’k et naor Frank toe sture. Ankem weke nog niet mar dan de weke daorop kan hi’j d’r mit an de slag.

Za. 26 juni 2004.
Et was mi’j et daggien wel. Vandemorgen al weer veur zeuven ure drok doende. Nog vlogge even de laeste veurbereidings veur et ‘startschot’. Nog even een briefien maeken veur disse en gene, die en die nog even bellen. O ja, en de Liwwadder vlogge even deur vanzels. Een mooi stokkien ‘In vijf minuten is de bijbel in Stellingwerfs te vertalen’ op de veurste ziede mit een verwiezing naor bladziede negen veur et hiele verhael. Gurbe haokte daor stark op in mit: No kin de preek ek wol wat flotter. Veur daj’ et weten is et dan tien ure en giet de tillefoon veur een (al eerder ofpraot) laeste interviewgien (Odrie). Daornao belde Omrop Fryslân nog om een ofspraoke te maeken veur drekt nao twaelf ure. Die jonges he’k angeven dat dat wel es muuilik wodden kon omreden ik niet van doel was om as gastheer de karke uut te lopen. Veur et zingen de karke uut, daor kan ‘k mi’j wel van alles bi’j veurstellen mar a’k midden in een goed gesprek bin dan loop ik d’r (in dit geval) niet uut om een radio-interview te geven. Ik hope (en neme an) dat Hans Koster dat begript. Mi’j donkt da’k roem van te veuren angeven hebbe dat et d’r an zat te kommen en hoe as de warklieste d’r uut zag.

Et was een prachtig en veural ok een ‘biezunder goed’ ure. Een goeie vuuftig man (m/v) van warkelik interesseerde meensken (in geleuf en/of tael) hebben - an de kompelmenten te heuren - een butengewoon genoegelik ure mitmaekt. Een stokkien femilie-historie van mien breur Anne, een prachtige (vaeke lachen) causerie van perfester Van der Meiden, de beschreven warkwieze van de vertaeler en mooie daank- en anvieterende woorden van domenee Klooster. Klooster wees d’r op dat hi’j al een posien vernemt dat d’r (weer) hoe langer hoe meer belangstelling komt veur et (zien) preken in de streektael. Hi’j had de onderviening dat d’r bi’j een preek in zoe’n streektael ok aorig meer meensken in de karke zitten as bi’j een tredisionele preek.

Perfester Van der Meiden uut Nijverdal begon zien causerie ok mit de fielsetaosies veur disse vertaeling van Genesis in et Stellingwarfs. Veerder haelde hi’j tal van veurbielden an van perblemen daor aj’ as vertaeler niet omhenne kunnen. Hi’j benaodrokte daorbi’j de vraoge wat de gevolgen wel niet wezen kunnen veur de theologie, de dogmatiek en de verbelinge in roeme zin. Hi’j verhaelde mit allerhaande veurbielden et onderscheid van drie laogen waor as de tael verschillend bruukt wodt: de plechtige tael, de omgangstael en kroegpraot.

Nao Van der Meiden heb ik uut de doeken daon dat et mit et vertaelen laoten deur een komputer allienig niet goed komt. Hoewel de PC best wel een goeie hulpe wezen kan, mos et meerste wark toch gewoon mit heufd en hanen gebeuren. Mit al mien twiefels en perblemen kon ik de hieltied bi’j Frank terechte die mien wark konterleerde en de neudige veurstellen veur verbeterings andreug.

Wa’k vandaege wel een betien mist hebbe was et karkevolk. Die zullen nog wel drok in de weer wezen mit et PKN wodden. Een mitvaler was et bezuuk van Jansma, raodslid van de Christen Unie van Oostaende. Dat fraktieveurzitter Karst van de PvdA d’r ok was kan wel om meer as iene reden west hebben. Doe’k gister wel twie ofzeggings toegelieke kreeg van blispoters van de Schrieversronte kreeg ik et even benauwd mar ze weren gelokkig roem vertegenwoordigd.

Et eerste aemeltien mit kompelmenten van iene die Genesis in et Stellingwarfs al vlogge even deurneumen het, komt krek binnen. Daank daorveur.

Vr. 25 juni 2004.
Vandemorgen (al vanof zes ure) eerst mar even weer een peer uren drok an ’t wark west. Veur de rest van de dag eins allienig mar doende west mit tillefoonties en de laeste veurbereidings treffen veur et ‘startschot’ van morgen. Om goed tien ure nog een tillefonisch interview veur Odrie en dan gao’k tegen half elf die kaante mar uut. D’r roegelden ok al een peer ofzeggings binnen. Jammer (veur die meensken), al was et allienig mar omreden ze et verhael van perfester Van der Meiden now missen zullen en die kaans kriegen we hier in disse omkrieten niet zo vaeke. Gelokkig weren d’r ok nog een peer die d’r op et laeste mement van heurd hadden en ok nog graeg kommen wollen. Now, mi’j liekt d’r is plak zat in die mooie oolde karke van Berkoop.

Tot morgen dan mar.

Do. 24 juni 2004.
Vandaege weer een drokke dag had en toch haost niks daon. Vandemorgen eerst even een peer uren gewoon an ’t wark west tot dat d’r een fotoman van de kraante belde. Hi’j was in de buurt en wol et liest drekt even langeskommen. We hebben gezellig een aanderhalf ure praot en oh ja, hi’j het ok nog een foto maekt. Zal morgen wel in de Liwwadder staon. Aorige man trouwes. In de loop van de middag o.e. een tillefoontien van 3FM radio of ik ankem zundagaovend even een stokkien uut de Stellingwarver Biebel veurlezen wol. Een stokkien uut Lucas (De verleuren zeune) liekt mi’j wel aorig toe om dat veur de (meerst jonge) luusterers veur te dregen. Van dat stokkien wa’k vandemiddag krek een 500 printies an ‘t maeken om ankem zaoterdag vot te geven. Een warkliest en vier keer etzelde verhael over ‘De verleuren zeune’ mar dan in verschillende vassies.

Deur al zok roezig gedoe was mi’j de tied haost ontscheuten. Om halfzesse mos ik in Noordwoolde wezen om een uurtien te ‘Wiespraoten’ veur Radio Weststellingwerf Centraal. We kwammen deur technische mankementen wat staorigan op gaank mar doe we slag ien keer te pakken hadden, kwammen we an et aende haost tied te kot. Britt mos niet al te laete vot want iene van de onderwarpen (bezunigings van ’t Westaende) wol ze ok nog even veur de Gemienteraod (of raods-kemmissie) op de bodden brengen.

In Noordwoolde wa’k nog even bi’j goekunde (staot niet in de dikke, goegemiente ok niet) hangen bleven. Doe’k op huus an gong wa’k geleuf ik de ienige op ‘e weg. Ik daenke dat d’r voetballen op de buis was. En ik bin een gelokkig meenske, ik hebbe hielendal niks mit voetballen en mit ‘oonze’ jonges.

Wo. 23 juni 2004.
We mossen d’r vandaege al weer vroeg op uut. Wawwe uutspoekt hebben? Daor zeg ik vandaege lekker niks over.

In de Ni’je Ooststellingwarver kwam ik vanaovend een stokkien over de ni’je zommerspeulen van de Schrieversronte, van Pieter ok een ni’j woord tegen: "kleraosie". Eerst docht ik dat ‘de’ d’r veur weg valen was bi’j de drokker mar … nee. In et brieder verbaand van ooriezers, onder- en bovermussen mos et vanzels wel haost wat mit kleren te maeken hebben. Even naokeken in de dikke Bloemhoff en ja: 1. Kledingstukken, kleren. En dan een typische uutspraoke van een vrommes: ‘k Bin aorig deur de kleraosie henne, d’r moet (neudig weer es –pb-) wat ni’js kommen. Die heur ik zels ok zo vaeke! Meerstal neem ik dan een ni’je ‘Knip’ of ‘Marion’ veur heur mit en zegge dan: moej’ daor mar een mooi petroontien uutzuken en dan vraog ie je mem mar as die et even an tied het. Dat ze heur mem niet zo gek krigt, dat hewwe al es uutperbeerd. Die trap d’r niet (meer) in, en zo drieft et dan vanzels weer (even) over. D’r ston nog een hiele aorige beschrieving in de ‘dikke’ bi’j die kleraosie: We hebben onder niet vule ruumte, de kleraosie hebben we daoromme haost allemaole op ‘e zolder. Ik krege daor opiens hiele waarme gevulens bi’j.

De fan-aemel had ok weer een peer bemoedigende (en anvieterende) berichies vandaege. He’k ok allemaole even weer een berichien weeromme stuurd. Et bin d’r nog laank gien honderd op iene dag, dat zo hool ik et nog wel even vol. As ’t even kan wi’k iederiene persoonlik op de hoogte holen. De oflopen naacht (gisternaacht dus) nog even een peer uren mit Marcus in de weer west. Now nog ien heufdstok en dan et gehiel nog een keer deurvrotten en dan kan Marcus naor Frank toe. Kan ik ondertussen even bekommen. En de fotograaf die vandaege belde zol et morgen even opni’j perberen want ja, wi’j weren vandaege niet thuus now. Wawwe mit oons beidend daon hebben? Daor zeg ik vandaege lekker niks over.

De. 22 juni 2004.
Vandemorgen weer een biesterbaorlike gebeurtenisse mitmaekt bi’j zoe’n groot bedrief. Et batteri’jgien van mien busetillefoon was niet zo best meer. Een peer tellen praoten wol nog wel mar as ’t wat langer duurde dan leut de batteri’je et ofweten en wodde de verbiening verbreuken. Ik daenke, dan hael ik mi’j even een ni’je batteri’je want veerder ha’k gien klachten over et toestellegien. Al meer as drie jaor reizigt et ding altied mit mi’j mit en zo now en dan bin ‘k daor mar wat wies mit. Waor ak al een betien bange veur was gebeurde warempel ok. Een ni’j batteri’jgien was duurder as een ni’j toestel, zee de verkoper van de winkel waor ik al meer as tien jaor (gien dikke) klaant bin. Now, doe mi’j dan mar een ni’j toestel leek mi’j. Ik wol d’r ok graeg een inbouwsettien bi’j hebben veur in de auto. Dat kon. Ik mos bi’j him (in Drachten) € 25,00 as borg betaelen, dan mos ik naor Liwadden om et inbouwpakket op te haelen en te slotte zol d’r dan een mannegien bi’j mi’j thuus kommen om et settien in mien auto in te bouwen. Et hiele verhael za’k je hier besperen mar et koste mi’j meer as drie uren en et wodde niet aanders. Krek etzelde mit et abonnement. Gewoon deurlopen laoten kon wel mar dan wa’k aorig duurder uut as et abonnement veur een halfjaor ommezetten. Dan wa’k an et abonnement in ’t gehiel € 60,00 meer kwiet mar ik bespeerde dan € 198,00 op et tetaol. Begriep ie et, begriep ik et.

Vandaege een kraanteman en een man van de radio op vesite had veur elk een ‘diepte interview’ over et vertaelen van de Biebel. Aorige meensken mar ze vraogen je et honderd uut. De kraanteman he’k in voegelvlocht de hiele warkwieze uutstokt en zien laoten. Van de Nederlaanse tekst tot et ontstaon van de Stellingwarver vertaeling. Hi’j het ok een stokkien mitneumen om in de kraante te zetten. Ik heb him nog wel vraogd as hi’j op zien meenst de citaoten in een betien geef Stellingwarfs opschrieven wol. Hi’j zol zien best doen en daor vertrouw ik dan mar op. De man van de radio wol graeg wat veurkennis hebben en kwam zaoterdag wel veur de opname.

Mit de koster van de karke wo’k eins wat koffie of thee regelen bi’j et binnenkommen van et volk mar dat was niet zo ienvooldig. Hi’j kon wel veur een bescheiden tal meensken wat regelen mar as et al te vule wodden dan kon ’t wel es muuilik wodden. We hebben mar ofpraot dat allienig veur de meensken die van veer kommen mossen en de warkelik verslaafden (waoronder ikzels) een kop koffie in de konsestorie tegenover de karke kriegen konnen.
 

Ma. 21 juni 2004.
Daor hawwe vandaege de langste dag al weer en de kachel moch nog wel haost een betien an. Et is te doen vanzels mar aj’ de hiele dag een betien stille zitten te daenken, te lezen en wat te schrieven dan is ’t mar krappies an.

D’r roegelt now ok geregeld wat fan-mail in mien elektrische postbusse. Rondomme uut et laand laand bin d’r meensken die mi’j (oons) even een hatte onder de riem stikken vanwege et Biebel vertaelprojekt. Da’s mooi vanzels. Dan weej’ te meenste waor aj’ et veur doen. Stel daj’ d’r een hiele lange tied hielendal niks op heuren zollen, dat zol verekte sneu ankommen liekt mi’j. En och, as et heur wat spreided dan kan ‘k ze nog wel an. Vandaege nog een aorig stok an et evangelie van Marcus warkt. Nog een peer heufdstokken dan is die roegweg klaor en kan dan Frank him d’r op stokkend bieten. Et wodt ok neudig es weer tied om mit Frank es even weer bi’j te praoten mit een ballegien gehak of zo d’r bi’j. Now ja, een peer ballegies gehak vanzels want wi’j bin gezonde jonges. Een goed boek en een goeie balle gehak, vule meer het een meenske toch eins niet neudig? Now ja… veur een peer uren dan.

In een IT-vakblattien ston, dat d’r hoe langer hoe meer perblemen kommen mit pattekelieren en een ADSL-ansluting. D’r wodden tegenwoordig ommeraekt van die doe-et-zels pakketties verkocht van omdebi’j € 15,00 in de maond, die o zo makkelik an te sluten binnen neffens de foolder. Aj’ alles krek ni’j staon hebben of op etzelde mement anschaffen dan zal et wel (een betien) waor wezen mar pattie meensken raeken d’r meer op aachteruut as dat ze d’r op veuruut gaon mit dat ADSL en heur doe-et-zels pakkettien.

Vandaege de kraanten ok even weer deursnuuid veur wat onderwarpen van oons pergramme ‘Wiespraoten’ van ankem donderdagaovend. We hoeven eins mar een stok of drie, viere of vuuf onderwarpen mar ik zie haost in elk artikel wel een anleiding om uren over te praoten. We zullen wel es zien, wat et wodt.

Ik kiek krek nog even in Johan zien dagboekien en zie daor staon: In et laeste nommer van de Moanne besprekt Jan Pieter Janzen verschillende internetdagboeken. Et toeval wol da’k vandaege even eerder lezen hadde: (Farsk, 27 july) Einredakteur Jan Pieter Janzen fan it algemien-kulturele tydskrift De Moanne ferlit mei yngong fan 1 augustus (2003 ‘pb’) de redaksje. Wie moe’k now geleuven? Et kan vanzels ok wezen dat Jan Pieter veurig jaor ontslag neumen het, spiet kregen het en weeromme kommen is. En zo bin d’r nog wel een peer meugelikheden. Mar toch…